UKINIAMINI NITAKWAMBIA
"Renatha!" Edrian akamuita huku akiangalia glasi yake yenye mvinyo.
"Edrian, nashukuru kwa kukubali wito wangu" Renatha akamwambia baada ya kushusha glasi yake
"Mmmmm" Edrian akaguna
"Najua una maswali mengi ambayo unataka niyajibu" akaendelea Renatha
"Sio maswali Renatha, swali langu ni moja tu" akamkazia macho
"Sawa. Nami nitalijibu swali lako bila shaka" Renatha akamwambia Edrian ambaye alibaki kumtazama akitarajia jibu lake alipate lakini swali jingine likaongezeka..
"Kabla sijajibu swali lako, nitakuuliza swali"
"Ikiwa mama yako na mpenzi wako watapotea ni nani hasa utaanza kumtafuta?" Renatha akamuangalia Ed ambaye alishtushwa na swali lile akabaki akimwangalia usoni!
"Najua unataka kusema utawatafuta wote, fikiri tu umepewa dakika kumi utaanza kumtafuta nani?" Akauliza tena Renatha
Edrian akamtazama kisha akatabasamu, "ukweli ni kwamba nitamtafuta mama yangu sababu najua m__" Kabla ya kumaliza Renatha akamkatisha
"Sababu sio ya msingi Edrian ila utamtafuta mama pasipo kusita"
"Renatha, unataka nini kwangu?" Edrian akamuuliza hali uso wake ukikosa ustahimilivu kabisa
"Kuna mambo hautanielewa wakati nayafanya sababu hujui msukumo nyuma ya maamuzi ya__" kabla ya kumaliza Renatha alinyamaza ghafla, Edrian akamtazama usoni kwa mshtuko uliokuwa wazi kisha akafuatilia nini kilimshtua!
Akajaribu kufuatisha macho ya Renatha, lakini kulikuwa na watu wengi kwa upande ule. Alijikaza macho akaona mwanaume ambaye hakufanikiwa kuona sura yake sababu aliketi akimtega mgongo. Akataka kumuuliza kama mtu yule ndie alimshtua au la, lakini kwa kuwa hakutaka kubadilisha mazungumzo yao akaendelea
"Una maamuzi gani unayotaka kufanya ambayo yananihusu?"Edrian akauliza baada ya kurudisha macho yako kwa Renatha
"Ninataka kuaminiwa nawe lakini kwa nini nataka uniamini ni jambo ambalo siwezi kukwambia sasa!" Renatha akamwambia
"Mmm" Edrian akaguna kisha akafumba macho na kufumbua lakini kabla hajasema akawaza kwa nini Allan alichukua muda mrefu kurejea. Renatha akainama huku akimwangalia Edrian usoni akanong'ona
"Kuna kitu nataka uwe makini nacho lakini sitakwambia kwa namna gani, utakapo niamini na kuniambia kitu unachokificha ambacho hakuna mtu mwingine anajua zaidi yako, nami nitakwambia ufanye nini"
Edrian akamwangalia Renatha usoni huku akishangaa alikuwa akizungumzia nini. Akageuka kumuangaza Allan amwambie anaondoka akihisi hana tena uvumilivu wa kuendelea kumsikiliza Renatha. Alipoangalia angalia, macho yake yakashtushwa na mtu aliyesimama hatua chache kutoka kwenye mlango wa kuingia...
"Retha?" akajikuta akisema kwa sauti ya chini kitendo kilichomfanya Renatha aangalie mlangoni ambapo aliona mwanamke ambaye alionekana kumtafuta mwenyeji wake
Edrian akainuka na hatua zake zikamwelekea Aretha akihisi alikuja pale kumuona akizungumza na Renatha akihofia usiwe ni hisia za wivu. Kabla ya hatua za Edrian kumfikia, tayari kulikuwa na mtu alitangulia mbele yake akimwelekea.
"Allan?" Edrian akapunguza hatua huku akipata mshangao alipoona Allan akimuelekea Aretha
Edrian akasogea aliposimama Aretha ambaye naye alikuwa kwenye mshtuko wa kumuona Allan na yeye.
"Aretha samahani usije ukafikir__" Allan alijaribu kumwambia lakini alikatishwa na sauti nyingine iliyotoka nyuma yao.
"Aretha, karibu"
Allan na Edrian wakageuka kumwangalia aliyesema, wakati huo Aretha alibaki kwenye mshangao huku uso wake ukibaki kumtazama Ed.
"BM" Edrian akatamka taratibu huku akihema kwa nguvu.
BM akamsogelea Aretha akionesha kuwa yeye ndie mwenyeji wake na kumfanya Allan asogee pembeni
"Samahani naona kuna muingiliano umetokea hapa na watu unaofahamiana nao, karibu tuketi" BM akamwambia kisha akamgeukia Edrian huku akinyoosha mkono kumuelekea
"Mr Simunge samahani sikufahamu kama uko hapa. Habari ya kwako?" Akamsalimia Edrian ambaye aliupokea mkono na kurejesha salamu ile
"Salama"
Macho ya watu sasa yaliwaelekea wao, kwa kuona hivyo Edrian akamwangalia Aretha ambaye ilikuwa wazi kuwa yuko kwenye bumbuazi la kile kilichoendelea
"Ni mwenyeji wako?"Akamuuliza Aretha ambaye alimwangalia na kisha akatikisa kichwa kukubali