SUBIRA RIAN
Nguo kadhaa zilikuwa juu ya meza, pembeni viatu vya kike na kiume na mikoba mikubwa na midogo.
V akainua nguo moja baada ya nyingine, akaitolea maelezo ambayo kuna wakati yaliwafanya wacheke. Katika nguo zile asilimia kubwa zilikuwa nguo za wakati wa baridi, masweta na makoti yaliyoshonwa vyema. Edrian akachagua makoti machache, suruali na viatu.
Aretha alivutiwa na suruali kadhaa za kike, masweta, viatu, ilikuwa ni jukumu la V kumshawishi vile alivyoona bora na vyenye kufaa..
"Chukua hivi Aretha, viatu vyepesi havifai kwenye maeneo yanayoanguka barafu"
Aretha akamwangalia Edrian ambaye alikuwa akitazama aina ya mikoba ya kike, akachagua miwili iliyomvutia na kumpatia
Baada ya muda wa kuchagua kumalizika, V akaita mhudumu akaondoa vile ambavyo havikuchaguliwa. Wakabaki na vile vilivyochaguliwa huku V akimuinua Aretha kwa ajili ya kujaribu nguo. Wakaingia kwenye pazia huku V akipangilia zile nguo na viatu.
Kila alipojaribu Aretha hakutaka kutoka kumuonesha Ed, alipomaliza akatoka akiwa amevaa kama alivyokuja. Edrian akamwangalia kwa kusikitika
"Hutaki nikuone" akalalamika
"Hahahaha kila mmoja ana 'suprise'. Subira subira Rian" Aretha akamwambia huku akicheka kwa kurudia maneno yaleyale aliyomwambia
"Hhahaha haya,Tafadhali tufungie V" akamwambia huku akitoa kadi yake na kumpatia
V akaita mhudumu ambaye alibeba vyote vilivyochaguliwa, wakatoka kuelekea sehemu ya malipo na kuwaacha Ed na Aretha.
Ed akafungua jokofu na kutoa maji akampatia Aretha huku yeye akibaki na mengine.
"Rian tunakoenda kuna barafu inaanguka?" Akauliza Aretha kwa shauku
Edrian akamuangalia huku akitabasamu, "Suprise"
Aretha akacheka "Tukitoka hapa tunaenda wapi?"
"Nako pia ni suprise hahaha"
*************
Derrick alikutana na Yassin katika harakati za kutafuta mahali ambapo onesho la Beruya lingefanyika. Wakiwa wametembelea moja ya ukumbi uliopatikana kwenye hoteli ya The Crest!
Baada ya kuelekezwa gharama na mambo yote yaliyohitajika wakajaribu kuwasiliana na Beruya lakini simu yake ilionesha Kutumika wakati wote. Yassin akamwambia Derrick
"Nina wasi wasi juu ya Beruya maana si kawaida yake kuwa 'busy' na hata asipokee simu zangu!"
"Mh..... unahisi kuna shida?, au nijaribu kumtafuta mimi?"
Derrick alipojaribu kumpigia simu Beruya akaambiwa namba haipatikani. Wakaamua kwenda nyumbani kwake lakini walipofika hakukuwa na dalili za kuwepo Beruya na hata baada ya kuulizia kwa jirani zake bado hakuna aliyekuwa na taarifa zake. Wakaamua kuondoka na kuelekea kwa Damian wakiamini wanaweza kupata majibu sahihi huko.
************
Safari ya Ed na Aretha iliishia nyumbani kwa Brian na Rose.
"Karibu sana Aretha" Brian akamkaribisha Aretha kwa furaha mara tu alipofika mlangoni,
"Asante" akashukuru huku akimtazama Ed kwa mshangao kwamba Brian alimfahamu,
"Hahaha usishangae Aretha, ulikuwa ni kibwagizo mdomoni mwa huyu 'senior bachelor' tangu akufahamu...." akamwambia Brian
"Ooouuch!" Brian akaugulia maumivu ya ngumi ambayo Ed alimpiga begani kumzuia asiseme
Aretha akamwangalia Ed akaimkataza asifanye hivyo
"Oooh asante Aretha, atanivunja mifupa huyu" Brian akalalamika
"Kwa hiyo hao wageni utabaki nao hapo nje hadi waondoke eeeh" Sauti ya Rose mkewe Brian ilisikika kutokea ndani akiuliza kwa utani na kumshtua Brian ambaye furaha yake ilikuwa kuu kumuona Aretha pamoja na rafiki yake...
"Ooooh nisamehe laaziz! Wageni karibuni ndani" Brian akawaelekeza kuingia ndani
Walipoingia ndani, Rose aliketi kwenye kochi huku akipata juisi akainuka na kuachia mikono yake ili kumsalimu Aretha.
"Asante sana Aretha, nimefurahi umekuja" akamkumbatia na kisha akamketisha kwenye kochi alilokuwa ameketi
Brian akaelekea jikoni, kisha akarejea na glasi moja ya juisi na kumkabidhi Aretha
"Aretha huyu bwana anakuhudumia vyema kweli" Rose akamuuliza Aretha, swali lililomfanya Ed kuangua kicheko
"Toka lini mimi ninawahudumia watu vibaya jamani, kwanza naona humu ndani mgeni ni mmoja tu!" Akainuka na kuelekea jikoni
"Aaahhh si umeona unajua kujihudumia" Brian akamwambia huku akiketi kochi lililotazamana na lile aliloketi mkewe na Aretha.