MDAU MKUBWA
Derrick" Aretha akaita
"Naam" akaitika Derrick
"Unadhani Ria. .aah samahani Edrian ana maadui wengi?"
Derrick akamwangalia Aretha kisha akatabasamu, "Retha, hebu niambie nini hasa unaogopa, maana kila mwanadamu ana maadui. Wengine ni waharibifu na kuna wengine la!"
"Aaaha..basi nawaza tu! Inawezekana unasema kweli najitia hofu" Aretha akatoa simu yake ambayo iliingia meseji muda huo.
Akasoma na kuijibu huku akimuacha Derrick katika tashwishwi ya kutaka kujua ni kaka yake au la.
Hadi muda ule Beruya alikuwa bado hajafika, wakaendelea kumsubiri huku wakiwa wameketi mahali pale walipoelekezwa. Walizungumza mambo mbalimbali ikiwa hasa yale yaliyohusiana na uchoraji,
"Oooh Aretha samahani nimekuchelewesha" sauti ya Beruya iliwashtua kutoka katika maongezi yao..
"Aahha hapana" Aretha akainuka ili kuweza kusalimiana
"Derrick karibu sana" Beruya akamsalimia
"Asante, tumekusubiri sana B aisee" Derrick akalaumu
"Hahaha pole sana rafiki yangu, majukumu ya kiofisi na maandalizi vilinikaba...aaha wamewahudumia kwa vinywaji kweli?" Akauliza Beruya
"Aaaah wapi, koo limekauka B, hawajui ukarimu watu wako" akaendelea kulalamika Derrick
"Hahaha wasamehe Derrick bwana, watakuwa wamekamatwa na majukumu wakasahau" akasema Beruya na kuelekea kwenye eneo ambapo kulikuwa na jokofu dogo na kutoa boksi la juisi kisha akachukua glasi nyepesi na kurudi nazo mezani.
Wakaendelea na mazungumzo huku akimpa Aretha maelekezo wakati wakipata juisi taratibu.
Wakainuka na kuelekea mahali ambapo Beruya alipaandaa kwa ajili ya picha as Aretha kukaa.
"Asante sana Beruya" Aretha alifurahi sana na kumshukuru akionesha kuridhika na eneo lile.
Derrick akaridhika baada ya kuona Aretha akifurahia
"B, samahani kuna kitu nataka nimuulize!" Derrick akamgeukia Beruya
"Uliza tu rafiki yangu" Beruya akamjibu
"Unamfahamu mtu aitwaye BM, maana tumemkuta humu ndani"
Aretha akageuka haraka kumwangalia Beruya usoni maana naye alitamani kumuuliza swali hilo hilo lakini alikuwa akisubiri muda watakapomaliza mazungumzo ya picha!
"Aaaaah Bon, alikuwa hapa?" Beruya akauliza kwa mshangao
"Kumbe unamfahamu?" Aretha akauliza nae akishangaa
Wote wawili wakabaki wakimuangalia Beruya ambaye alijaa tabasamu wakati akiuliza
"Ndio namfahamu Aretha, ni mdau mkubwa sana kwenye biashara ya picha, mara kadhaa amehudhuria maonesho tuliyofanya na Melissa" akaeleza Beruya kwa furaha huku akishangaa kama BM alikuwa mahali pale.
Derrick akamwangalia Aretha kuona mwitikio wake kwa taarifa ile
"Aretha, BM anapenda sana picha lakini mpaka anunue ni lazima hiyo picha iwe na mvuto anaoutaka" Beruya akamwambia
"Alishawahi kununua picha kwako?" Derrick akauliza
"Hapana Derrick, sio mimi wala Melissa tumefanikiwa kumuuzia picha lakini alitoa mchango mkubwa kutusaidia kuhakikisha tunafanikisha maonesho yetu mara zote tulizomwendea"
"Uliwahi kumwambia chochote kuhusu mimi?" Aretha aliyekuwa kimya akauliza
"Kuhusu wewe!!! Hapana. Hata sikujua kama yuko hapa" Beruya akaongea kwa shauku kubwa huku akimshika mikono Aretha
"Oooh kama atakuwepo huenda ukapata nafasi ya kuongea nae Aretha"
"Aaaahhh" Aretha akashangaa
Derrick alipoona mshangao wa Aretha akaamua kubadilisha muelekeo wa mazungumzo
"Hivyo, B kesho picha zinawekwa mida gani?" Akauliza
"Oooh kesho picha zinawekwa usiku saa sita Derrick japokuwa zinaweza kuletwa mapema na ukawepo kuhakikisha zinawekwa inavyotakiwa" Beruya akamwambia
"Oooh basi sawa. Tutafanya hivyo. Kuna ziada labda?" Akauliza Derrick
Aretha alikuwa katika dimbwi la mawazo mpaka mkono wa Derrick ulipomshika begani na kumfanya amgeukie
"Kuna maelekezo machache tu kwenye uwekaji wa picha natamani tuongee na Aretha" Beruya akamshika tena mkono Aretha na wakaelekea mahali ambapo kulikuwa na baadhi ya picha zilizokuwa kwenye majaribio.
"Unapoweka picha zingatia hadithi iliyo nyuma ya uchoraji wako" Beruya akaendelea na kumuelekeza Aretha ambaye sasa alijitahidi kumsikiliza
Wakaendelea na maelekezo yale kwa muda mrefu kidogo mpaka walipomaliza bado Derrick hakumuacha Aretha na alionekana kufurahia, mpaka walipomaliza na kuondoka.