Chapter 9

Tiniyak ni Jenevie na mahigpit ang pagkakatali ng bed sheet at ng kumot. It was an effort to do so. Nakabenda pa kasi ang braso niya. Maingat siyang lumabas sa terrace dala iyon at mahigpit na itinali sa railing.

Hinintay niyang kumagat ang dilim habang binubuo ang plano sa isip. Kailangan niyang makatakas. Di siya pwedeng dumaan sa mismong pinto dahil nasa malapit lang si Rolf. Maririnig siya nito. Kailangan lang niyang makababa sa terrace gamit ang pinagbuhol niyang bed sheet at kumot. Tapos ay tatakbo lang siya sa gate. Mula doon ay maari na marahil siyang makakuha ng sasakyan na magdadala sa kanya palabas ng Stallion Riding Club.

Nanlamig ang kamay niya nang makita ang lupang babagsakan niya kung sakaling malaglag siya. Baka hindi lang braso at balikat ang ibenda sa kanya kundi ang buo niyang katawan. Sana pala ay nagpaturo siya kay Jenna Rose. She was a straight girl. Di niya ugaling magtatakas ng bahay kapag gabi. Di tulad ni Jenna Rose na mahilig sa gimmick. Sana pala ay sinubukan niyang tumakas kahit minsan.

"Kaya ko 'to!" She wanted to be free. Pagsisisihan ni Rolf na nakipagsabwatan sa kapatid niya para manatili siya sa riding club.

Sasampa na sana siya sa railing nang tumunog ang cellphone niya. It was Rolf. That was odd. Bakit di ito sa intercom tumawag? Lumabas ba ito ng villa nang hindi niya nalalaman? Ang alam niya ay nasa kabilang silid lang ito.

Napilitan siyang sagutin ang tawag nito. "Hello!"

Kapag di niya sagutin ay baka puntahan pa siya nito sa kuwarto niya. Mahuhuli siya nito at mabubulilyaso ang mga plano niya.

"What are you doing, Evie?" malambing nitong tanong.

"Nandito sa kuwarto ko. Nakikinig ng music. Nagpapaantok." Iniwan niyang bukas ang CD player para di ito makahalata. She faked a yawn. "Magpahinga ka na rin, Rolf. I am really sleepy. Good night."

Io-off na sana niya ang cellphone nang magsalita pa ito. "Do you know that you will look stupid if you try to escape through the terrace with that blanket and bed sheet? I know it is a classic but it won't look cute on you."

Namutla siya. "What?"

Nakikita ba siya nito? Luminga-linga siya sa paligid kasabay ng malakas na pagkabog ng dibdib niya. Alam ba nitong tatakas siya? Paano nangyari iyon? Wala namang ibang tao sa paligid. Paano nito nalaman?

"Kung tatakas ka at maglalambitin ka diyan, di ka makakababa nang maayos. I am pretty sure that you will fall. At kung pangit ang pagkakabagsak mo, baka buong katawan mo na ang ibenda. Hindi ka naman siguro suicidal, Evie," anito sa nanunuyang boses. He was making fun of her.

"Nasaan ka?" pasigaw niyang tanong.

"Nandito sa TV room," kaswal nitong sagot.

Parang susugod siya sa giyera nang puntahan ito sa TV room na katabi lang ng library. Malakas niyang kinatok ang pinto. "Rolf, open the door!"

Nakangiti nitong binuksan ang pinto. "Come in."

"Paano mo nalaman na…" Nasagot ang tanong niya nang makita ang mga TV monitors. Isa doon ay nakatutok sa terrace ng kuwarto niya. "Kinukunan mo ako ng video? Nakikita mo ang lahat ng ginagawa ko?"

"Isa sa feature ng riding club na halos lahat ng parte dito may security camera para tiyakin na safe lahat ng guest dito."

Wala siyang masyadong ideya sa paraan ng pamamalakad sa Stallion Riding Club. Hindi naman siya interesadong pumunta doon. Kahit na may boutique ang kapatid niyang si Jenna Rose doon ay di siya naglalagi nang matagal sa riding club. Hindi siya interasado sa mundo ni Rolf at ng mga babae nito.

"Pati dito sa villa mo?" Namula siya. "Pati sa kuwarto ko?"

Kung dragon lang siya, baga bumuga na siya ng apoy. Did he do it deliberately to humiliate her?

"No. Sa terrace lang, sa hallway, sa kitchen, dito sa library at pati sa lawn. Mga lugar na pwedeng daanan ng intruders. Your privacy is safe with me. Nagkataon lang na tatakas ka at sa terrace ka dadaan kaya nakita ko. I am sorry, Evie. If you are planning to escape from me, think of some other way. Kasi hindi mo naman ako basta-basta matatakasan dito."

"Hindi sa lahat ng pagkakataon nandito ka sa villa mo. Hindi rin sa lahat ng pagkakataon dala mo ang TV room mo," kampante niyang sabi.

Hinawakan nito ang baba niya. "Let's say that you can pass through the gate of my house. Pero di ka naman makakalabas ng riding club nang di mo ako kasama at walang permiso ko dahil guest kita. At mahigpit din ang instruction ko pati sa ibang members na di ka nila pwedeng ilabas ng riding club nang di ko alam. Or else their membership will be forfeited for good if not suspended."

Napatunganga siya. Ganoon ba katindi ang kapangyarihan ni Rolf bilang miyembro doon? Alam niyang malapit ito kay Reichen Alleje, ang kapatid ng may-ari. Pero possible bang I-detain siya nito doon hangga't gusto nito?

"You can't do this to me, Rolf. I have my own life to live. Alam mo ba kung anong pwedeng ikaso sa iyo oras na di mo ako hayaang makaalis dito?"

Nagkibit-balikat ito. "Hindi ko alam kung kailangang kasuhan ang isang taong concern sa iyo. Kapag ba pinoprotektahan mo ang isang tao, siya pa ba ang kinakasuhan? Hindi ba dapat iyong taong matigas ang ulo at walang pakialam sa mangyayari sa kanila ang pinaparusahan?

Naningkit ang mata niya. "You don't have a hold on me anymore. Hindi na kita boyfriend. Wala ka nang karapatan na kontrolin ang buhay ko."

Umiling ito. "Mukhang mali yata ang sinabi mo. Noong boyfriend mo ako, hinayaan kitang kontrolin ang relasyon natin. Wala akong ginawa kundi parang tutang susunud-sunod sa iyo. And when I suggest something regarding your welfare, you dumped me instead. But you can't dump me anymore, Evie. Hindi mo na ako boyfriend. At kahit na magalit ka pa sa akin, wala nang mawawala sa akin dahil wala na tayong relasyon."

Sinasabi ba nito na wala siyang kapangyarihan na utusan ito kahit na sarili niyang buhay ang pinag-uusapan? "You don't even have to bother yourself with me. Wala na tayong relasyon. Iyong mga babae mo na lang ang asikasuhin mo. Kung mamatay man ako, di ko na problema iyon…"

Nagdilim ang mukha nito. She stopped talking when he pushed her to the wall then he trapped her with his arms braced on either side of her. "Ulitin mo ang sinabi mo? Hindi ko na problema iyon? Hindi  ako kasing unfeeling mo na walang pakialam sa nararamdaman ng iba."

"Unfeeling na ako kung unfeeling. So just let me go."

She had never seen him this mad before. Sa kanilang dalawa ni Rolf, siya ang madalas na mang-intimidate. But with the intensity and fire she could see in his eyes, he was starting to scare her. Parang pinipigilan lang nito ang sarili para pilipitin ang leeg niya.

"Oras na magpilit ka pa ring umalis…"

Matapang niyang sinalubong ang mga mata nito. "Ano? Babantaan mo na naman ako? What? You will kiss me? Seduce me? Go ahead! Pero pagkatapos noon, pakawalan mo na ako. I have my own life to live away from your control."

Matapang siya. Kahit sa kay Kamatayan ay di siya natatakot. This was just Rolf. Wala siyang oras para magpa-intimidate dito.

Mariing nagdikit ang labi nito. "Am I really that low, Evie? Sa palagay mo ba ise-seduce kita para manatili ka lang dito sa riding club? Sa ugali mo ngayon, wala naman akong pakialam kung lumabas ka at tadtarin ng bala ng mga assassins mo. Baka nga ipamigay pa kita sa kanila, gift wrapped along with the trimmings."

"Ano?" bulalas niya. "Kung ayaw mo naman palang nandito ako, bakit pinipilit mo pa akong mag-stay dito? Just let me go and go on with your life."

Sabi na nga ba't sagabal lang siya sa buhay nito. Marahil ay naiinis ito sa kanya dahil di nito magawa ang mga nagagawa nito sa riding club. Di siguro ito makapagdala ng ka-date.

"Inaalala ko lang ang pamilya mo!"