Kasal (19)

Noong narinig ni Qiao Anhao ang boses ni Lin Shiyi, yumuko muna siya ng ilang

sandali at nang muli niyang itaas ang kanyang ulo, nginitian niya ito na para

bang may kinikimkim na galit.

Ang ibig sabihin lang nito ay hindi pala talaga totoo na mapayapa na ang

relasyon nila ni Lin Shiyi kagaya ng nangyayari nitong mga nakaraang araw:

Pinagplanuhan nito ang lahat para sa araw na 'to.

Dahil sa naging reaksyon ni Lin Shiyi, nakumpirma ni Zhao Meng na ito talaga

ang may pakana ng pagbabago ng script. Hindi niya kayang kumalma kagaya ni

Qiao Anhao kaya noong mga oras na 'yun, halos mangi-ngiyak siya sa sobrang

sama ng loob.

"Dahil ba ito sa script?" Gusto talagang pikunin ni Lin Shiyi ang magkaibigan

kaya kahit hindi na siya pinansin ng mga ito noong unang beses siyang

magtanong, muli nanaman siyang nagsalita habang nagpapanggap na binabasa

ang bagong script. Makalipas ang ilang sandali, gulat na gulat niyang sinabi,

"Ha, bakit naman nabago ang script ng ganito…"

Matagal ng mainit ang dugo ni Zhao Meng kay Lin Shiyi kaya hindi niya kaya

ngayon na nagpapanggap pa itong inosente, tuluyan na siyang sumabog at

walang isip isip na sinabi, "Isa lang naman ang rason kung bakit nagbago script

at yun ay dahil may mga walang hiyang bumaboy nito!"

Sino bang magaakala na mapipikon ang nagpapanggap na kalmadong si Lin

Shiyi matapos magsalita ni Zhao Meng. "Sinong tinatawag mong walang hiya?"

"Hindi ba sa lahat ng taong nandito, IKAW dapat ang pinaka nakakaalam kung

sino ang tinatawag kong walang hiya!" Pasinghal na sagot ni Zhao Meng bago

niya galit na galit na titigan si Lin Shiyi. Wala siyang balak na bigyan ito ng

pagkakataong mangatwiran kaya hindi pa man din ito nakasagot ay nagpatuloy

siya sa paglalabas ng kanyang sama ng loob, "Anong nangyari? Ginamit mo

lang naman ang pribado mong relasyon sa investor na sumusuporta sayo para

mapalitan ang script, at ngayon nahihiya ka na pinagsisigawan ko ang totoo?

Sige, bakit hindi mo sabihin sa lahat kung magkano ang inilabas mong pera para

baguhin ang script?"

Natural talagang matalas ang dila ni Zhao Meng kahit noong nagaaral palang ito

sa university kaya noong sandaling magbitaw ito ng masasakit na salita, hindi

na alam ni Lin Shiyi kung paano siya sasagot pero dahil ayaw niya talagang

magpatalo, pangasar siyang tumawa at padabog niyang itapon sa lamesa ang

hawak niyang script. Hindi siya interesado kay Zhao Meng kaya imbes na

makipagtalo rito ay galit na galit niyang tinitigan si Qiao Anhao.

"Qiao Anhao, wag mong sabihing nagagalit ka dahil dito? Ganito talaga ang

takbo sa industriya. Kung sino ang mayaman, siya ang makakakuha ng

pagkakataon. Kung hindi mo kayang tanggapin ang pagkatalo mo, bakit hindi ka

maglabas ng ilang libong milyon para maibalik ang script sa dati? Kung wala ka

namang kakayahan, wag kang umastang may karapatan kang magalit. Isa pa,

wag mo ngang utusan ang assistant mo na ieskandalo ang ibang tao!"

"Lin Shiyi, sa tingin mo ba inutusan ako ni Qiao Qiao na ieskandalo ka? Kung

ganun, bulag ka pala eh! Nabulag ka na ata simula noong maging kayo ng lalaki

mo!" Sa sobrang galit ni Zhao Meng, hindi niya na pinagisipan ang bawat

salotang bibitawan niya, "Papaalalahanan lang kita, Lin Shiyi! Tigil tigilan mo na

yang pagpapakitang gilas mo sa bulag mong boyfriend sa harap ni Qiao Qiao.

Hindi ka ba natatakot na masampal? Paano kaya kung malaman mo na yung

lalaking pinagmamalaki mo ay wala palang kalaban laban ultimo sa hibla ng

buhok ng boyfriend ni Qiao Qiao!"

"Isa pa, mataas na ang tingin mo sa sarili mo dahil lagi kang nanlilibre ng tsaa?

Kung yan lang ang kaya mo, gusto ko lang ipaalam sayo na sa isang salita lang

ng boyfriend ni Qiao Qiao ay kayang kaya niya tayong bigyan ng paid leave!

"Siyempre, wag na nating palayuin. Kung script lang ang kaya mong

manipulahin, pwes kaya ka niyang tanggalan ng mismong role! Oo nga pala,

hindi lang role mo ang kaya niyang tanggalin dahil kayang kaya niya ring patigil

ang pagfifilm ng pelikulang ito kahit kailan niya man gustuhin!"

Pagkatapos magsalita ni Zhao Meng, biglang tumawa ng malakas si Lin Shiyi na

para bang nakarinig siya ng sobrang nakakatawang biro at hindi nagtagal ay

naghahamon siyang sumagot, "Kung talagang kaya mong gawin yan, Qiao

Anhao, pwede ba naming irequest na tawagan mo siya? Papuntahin mo siya dito

ngayon para naman makilala siya ng lahat."