Chapter 26 - The Dinner

ZC FLOATING RESTO...

Mabilis bumaba ng sasakyan si Gian pagdating sa isang restaurant na nakalutang sa dagat.

Hindi niya inaasahang dito sila magkikita ni Ellah.

Napapalunok ang binata sa mga nakikita.

Ito ang restaurant na mayayaman lang ang may kayang pumunta.

Pagpasok niya sa loob ay sinalubong siya ng isang manager nakangiti ang babae.

"Good evening sir, any reservation?"

"Ah, I'm with Ms. Lopez?"

"Oh! This way sir!" Iginiya siya ng babae patungong VIP room.

"Thank you."

Akmang papasok na siya nang magsalitang muli ang staff.

"Boyfriend?" matamis itong ngumiti.

"No," magalang niyang tanggi.

"Suitor?" muling tanong ng babae.

"Ah, hindi."

"Client?" taas ang kilay nito pero nakangiti pa rin.

"No. Friend. We're friends," tugon na niya.

"Ah," tumango ito. "Enjoy your dinner!"

Tumango siya at pinihit ang pinto.

Bumungad ang isang mahabang mesa na punong-puno ng pagkaing may mga takip, binalot ng nakakatakam na amoy ang buong silid, sa harap nito ay naroon ang tagapagmana, umiinom ng wine.

"You like it?" Nakangiting untag ng babae.

"Yes. Pero bakit dito?"

"Gusto ko lang mawala ang stress. Upo ka."

Hinila niya ang upuang paharap dito.

"Tungkol nga pala doon, bakit ako nadamay sa kumpanya ninyo?"

"Mamaya na 'yan, kain muna tayo."

Binuksan nito ang mga pagkain at talaga namang napapalunok si Gian, dahil ang lahat ay puro sea foods ang inihahain sa kanyang harapan.

"Ano pang hinihintay mo? Lantakan na natin' to!" aya ni Ellah.

Nagsimulang kumain ang dalaga ng nakakamay.

"Sarap nito!" namimilog ang mga matang wika nito.

Kumain na rin siya.

Malalaking mga alimango, isdang inihaw, at sugpo ang kanilang nilalantakan pero gano'n pa man, hindi niya nakakalimutang himayan ang dalaga para hindi ito mahihirapan.

"Kaya ko na 'to, pero thank you. "

Ilang sandali pa, umandar na ang malaking bangka at pumalaot sa gitna ng dagat.

At dahil gabi na, nagkikislapan ang mga nagagandahang ilaw nito sa loob.

Tanaw ang naglalakihang gusali sa 'di kalayuan sa harapan na punong-puno ng iba't-ibang klase ng ilaw.

Natigil sila sa pagkain at tumanaw sa nadadaanan.

"Wow! Ang ganda!"

Napatingin siya sa apo ng don. Nakangiti ito at totoong namamangha sa nakikita.

Ngumiti siya.

"Buti pala nakaabot ako."

"Every 8:00 pm ang usad nito papunta sa gitna.

Nagustuhan mo ba?" nakangiti nitong tanong.

Mataman siyang napatitig sa mukha ng dalaga.

"Gian?" untag nito.

"Y-yes, ang ganda!"

"Kumain na tayo, nagugutom na talaga ako. "

"Sige!"

Masayang kumakain ang dalawa.

Nagtatawanan pa sila habang pinupuna ang bawat isa.

"Hayan pa o, lalaki ang kaharap mo tapos ganyan ka kakain. Mag papakapino ka naman. "

"Walang lalaki sa akin 'pag gutom ako. "

"Lahat ba sila wala kang parang nagugustuhan?"

"Wala, " derekta nitong sagot.

Ewan ba niya, pero natutuwa siya na hindi naman dapat.

"O, kumain ka pa, 'wag ako ang tingnan mo, nakakailang. "

Tumaas ang kilay niya. "Akala ko ba hindi ka naaapektuhan?"

"Kanina 'yon gutom ako, pero ngayon busog na ako, nararamdaman ko na. "

Natawa siya.

Binuksan niya ang wine at sinalinan ang dalawang kopita.

Ibinigay niya ang isa sa dalaga.

"Cheers?" itinaas ni Ellah ang hawak na kopita.

"Cheers!"

Nagpingkian ang mga kopita nila at sabay ininom ang alak.

Maya-maya lang tumayo na ang dalaga. Tumayo rin siya.

Pumunta ito sa bintana at pinanood ang tubig.

"Kahit papaano, natanggal ang stress ko, sarap ng pagkain. "

"Ang sarap nga, lalo at libre mo," tumawa siya.

"Sus, hindi lang sana ganito ang ilibre ko sa'yo pero kasi aalis ka na."

Unti-unting naglaho ang ngiti niya at sumeryoso.

"Kumusta ka na?"

"Hmm, heto buhay pa rin kahit feeling ko lalapain ako ng mga leon sa conference room kanina!" Humalakhak ang dalaga.

"Dahil ba sa akin?"

Sinulyapan siya nito bago inilipat ang mga mata sa mga gusali.

"Partly, pero nagawan ko naman ng paraan. Sinabi nilang kinidnap mo ako, may nagsabi pang nagpakidnap talaga ako at may relasyon daw tayo."

Kinagat niya ang ibabang labi at tumingin sa kawalan.

"I'm sorry. Dahil sa ginawa ko, nagkaproblema ka pa."

"Wala na 'yon, nasulusyonan ko na. Gusto ko lang malaman mo para naman aware ka na iniisip nilang may relasyon tayo kahit wala naman. Isa pa hindi rin magtatagal ang issue na 'yan kasi aalis ka na."

Hindi siya kumibo at nagtiim ang bagang.

Sigurado siyang ang mga kumakalaban na naman sa tagapagmana ang may pakana nito.

"Kailangan ba ng statement ko?"

"Hindi na. Huwag lang makarating sa media, okay na. Isa pa, pinagtanggol kita ro'n ah. Nilinis ko ang pangalan mong pilit nilang idinadamay sa paninira sa akin."

"Salamat. Bakit ba hindi matigil 'yang mga may galit sa'yo?"

Napalingon ito sa kanya.

"Naiintindihan ko kasi babae ako kaya hindi nila matanggap."

Mariin siyang umiling.

"Hindi. Hindi nila matanggap na magkaroon ng tagapagmana dahil gusto nilang pabagsakin ang lolo mo mismo."

Umawang ang bibig nito na muling napatitig sa kanya.

"Sino naman ang gagawa no'n? Hindi naman siguro taga kumpanya kasi tiyak maaapektuhan ang stock ng company kapag sila mismo ang maninira, damay rin sila."

"Hindi ko pa alam, pero malakas ang kutob kong malaking tao ang may gawa nito. Maimpluwensiya."

"Kung ang kalabang kumpanya ang gumagawa nito, paano nila nalaman ang tungkol sa pagkawala ng pera? Internal iyon."

"Anong pera ba ang nawawala? Ninakaw ba?"

Umiling ito. "Pinangbayad ko sa loan sa bangko. Alam ng nakakataas na opisyal iyon kaya hindi ko maintindihan bakit iniiba ang dating na parang ninakaw mo. Paanong nalaman ng taga media?"

"Hindi ako ang derektang maapektuhan kundi ikaw. Pinalalabas nilang ninakaw mo at kasabwat ako.

Sa sitwasyon mo ngayon, iwasan mo muna ang medya."

"Sana hindi mangyari 'yon. Kapag may eskandalong nangyayari sa isang kumpanya, ang pinakaunang maapektuhan ay ang stocks. Kapag nangyari 'yon, panibagong dagok na naman. Ayos lang naman kung ako lang ang maapektuhan, huwag lang si lolo, pero malabo 'yon. Bawat problema kapag nakarating sa medya malalaman ni lolo."

"Maiiwasan 'yon kung hindi makakarating sa medya."

Nilingon nito ang dagat bago bumuntong-hininga. "Sana nga."

Tahimik sila habang pinapanood ang bangka na pabalik sa daungan.

Pinangmasdan niya ang marahang pagtangay ng hangin sa buhok ng babae. Sa bawat simpleng paghawi ng kamay nito sa buhok ay tila napakasarap pagmasdan.

Pansamantala niyang nakalimutan ang sitwasyon at nakatitig na lamang.

Ilang sandali pa, huminto ang bangka at isa-isang naglabasan ang mga nasa loob.

Palabas na sila nang tumunog ang cellphone niya.

Ang kanilang head ang tumatawag.

"Sagutin ko lang 'to. "

"Sige, mauuna na ako, "

anang dalaga saka lumabas.

Tumango siya at sinagot ang tawag.

"Good evening sir. "

"Villareal totoo bang nagkakaproblema ang kumpanya ni don Jaime dahil sa ginawa mong pagdukot sa tagapagmana?"

Napailing siya mabilis talaga kumalat ang hindi magandang balita.

"Hindi naman masyado sir. "

"Ang mabuti pa siguro huwag mo ng ituloy iyong sa sabado para hindi ka madamay baka masangkot tayo sa gulo nila. "

Napatiim bagang siya at naglakad palabas.

"Hindi ko po magagawa 'yan sir, pasensiya na. "

Ibinaba niya ang cellphone pero hindi pinatay.

"Gian? Gian!"

Saka siya may napansin sa 'di kalayuan.

Tinanong niya ang isa sa mga staff ng restaurant.

"Anong nangyayari sa ibaba?"

"Si Ms. Lopez po pinag kakaguluhan ng mga reporters."

Tumahip ng husto ang kanyang dibdib at tumakbo pababa, kitang-kita niya ang takot na si Ellah habang pinalilibutan ng medya.

"Ms. Lopez, may relasyon ba kayo ng bodyguard niyo? "

"Ms. Lopez, nagdidate ba kayo ng bodyguard mo?"

"May mga spekulasyon ngayon tungkol sa " Kidnap Me." Gaano 'yon ka totoo?"

Kitang-kita niya ang paglinga-linga ng dalaga na tila hinahanap siya.

Subalit walang pakialam ang mga reporter na ito at inulan ng tanong ang dalaga.

"Ms. Lopez totoo bang may relasyon kayo ng dating bodyguard mo at may kinalaman ba ito sa nawawalang twenty million?"

Kumunot ang noo niya dahil sa sinabing malaking halaga ng reporter.

Na para bang sinasabing ninakaw at may kinalaman siya!

Nabaghan siya sa tanong subalit nang lingunin niya ito ay kitang-kita niya ang pagngisi at alam niyang nakita rin ng dalaga.

Inilang hakbang ni Ellah ang distansya ng babae at walang kaabog-abog na sinampal.

Sa lakas ng impact ay nabiling ang pisngi nito at halos matumba.

Mas uminit ang tensyon at hindi na kinaya pa ng binata.

"WALA SIYANG KINALAMAN!" sigaw niya kaya sa kanya nabaling ang atensyon ng mga ito.

Mabilis niyang hinarangan ang mga ito at ikinubli sa likuran ang dalaga.

Nagkislapan ang mga kamera at siya naman ang inulan tanong!

Tinitigan ng binata ang bawat isang naroon.

"Hindi kami nagdidate ng boss ko, kumakain lang kami."

May diin sa salitang boss sa pagbigkas niya.

"Ibig bang sabihin wala kayong relasyon?"

"Walang katotohanan ang bagay na 'yan. Hindi rin totoo ang spekulasyong kumakalat dahil ako ang may pakana noon hindi niya alam. "

"Kung gano' n kinidnap niyo nga siya? Ano ang inyong intensyon sir? "

" Ms. Lopez anong masasabi niyo tungkol sa Kidnap Me issue?"

Naiinis na umalis si Gian habang hawak sa braso ang dalaga at hinila ito.

"Sandali lang sir!"

Hindi na siya nagsalita at mabilis na pinagbuksan ng pinto ang dalaga at halos itulak niya ito papasok at mabilis siyang umikot sa kabila at nagmaneho palabas!

"Sir, Ms. Lopez, sandali lang ho sir!"

Habol-habol pa rin sila ng mga reporters.

Nakarating na sila ng highway at wala na ang mga ito.

Wala siyang imik habang nagmamaneho.

"Nakakainis! I swear pagbabayaran nila ito ng mahal!" gigil na wika ng katabi.

"Ms. Hindi mo dapat ginawa 'yon sa reporter."

"Nabigla ako. Pero hindi ko mapapayagang basta na lang niya ibuka ang marumi niyang bibig at maglabas ng basurang mga salita. Parang hindi reporter."

"Siguradong hindi siya reporter."

Saglit na natahimik ang dalaga.

"Mag-iingat ka, hindi mo na alam kung sino ang inyong kalaban. "

"Mababaliw ako nito, baka hindi na ako tatantanan ng medya!"

"Matatapos din ang mga 'yan at magsasawa, ang dapat mawala ay ang taong nasa likod nito."

"Dapat makagawa agad ako ng paraan para hindi lumala ng husto."

"Sa ngayon hindi pa kumpirmado pero may hinala akong hindi lang taga kumpanya ang nagdidiin sa'yo Ms. Ellah. "

" What do you mean?"

Napalapit ito sa kanya.

"Sa ngayon parang may kasabwat na taga labas. "

Hindi na umimik ang dalaga.

Naiisip niya kung taga kumpanya ang nagpakana nito madadamay lalo na kung maging ang stocks ay bababa. Posibleng walang mangahas na gawin ang ganitong bagay.

Kung gano'n maaaring taga labas ang gumawa?

"Sino naman? Kainis. Nawala tuloy ang busog ko."

"Ang mahalaga nakaalis ka sa panggigipit nila."

"Hindi ko alam kung anong gagawin kung wala ka Gian."

"Mag-iingat ka, hindi magtatagal, iiwan na kita."

"Hindi na ba talaga magbabago ang isip mo?"

"Nakatakda na ang flight ko, na adjust lang dahil sa okasyon sa sabado."

"Charity event, yearly 'yon ginagawa namin. Atleast makakasama ka pa naman sa sabado, siguro naman panatag na ako ng araw na iyon."

"Mapapanatag ka."

"Teka nga," hinarap na siya nito.

"Paano ka napapayag ni lolo?"

Sinulyapan niya ito bago itinuon ang mga mata sa daan.

"Kapag hindi ako sumunod, kakasuhan ako ng kidnapping."

"A-ano?"

"Magaling talaga manakot ang lolo mo."

---

LOPEZ MANSION...

Papasok pa lang si Ellah sa mansyon ay dinig na dinig na niya ang malakas na bulyaw ng abuelo.

"Wala pa ba si Ellah?!"

Binilisan niya ang pagpasok at inabutan ito sa living room nakaupo sa wheel chair kasama ang alalay na si Alex. Naka ternong pajama na itong pantulog habang hawak ang cellphone at masama ang tingin sa screen.

"Lolo, bakit po?"

Humagkis ang matalim nitong tingin sa kanya.

"Mabuti nandito ka na! Ano 'to?"

Halos ipagduldulan nito ang screen ng cellphone sa mukha niya.

Sinilip niya ang inilahad nitong video.

Nanlaki ang kanyang mga mata dahil ito ang kuha ng pananampal niya sa reporter.

"Ms. Lopez totoo bang may relasyon kayo ng dating bodyguard mo at may kinalaman ba ito sa nawawalang twenty million?"

Talagang kumulo ang dugo niya at iyong lapit na iyon ay buong lakas na umigkas ang palad sa mukha ng babae na ikinatulig nito.

Napailing siya.

'Hindi nga nailabas ng media, kumalat naman sa social media!'

"Ikaw ba 'yan?"

Natigilan siya.

"At ano itong nawawalang biyente milyones?"

Nahigit niya ang hininga.

"Totoo bang may relasyon kayo ni Villareal?"

Umawang ang bibig niya.

"IKAW BA TALAGA 'YAN!"