ANG GUSTO KONG SABIHIN

Mayroon akong bagong kwento

magkaibigang sa isa't isa'y nagkagusto

Ngunit nararamdama'y di pinansin at tinago

Dahil sa takot na husgahan ng mundo

Isa't isa'y palihim na iniibig

Sa bawat ngiti ay tinatago ang kilig

Sa bawat kilos ay gustong ipahiwatig

Ngunit nag-aalinlanga't tututulan ng daigdig

Sinubukang magtapat ng isa sa kanila

Ngunit nang magsasalita na'y biglang naalala

Mga magulang nila'y masasama nga pala

Kung magtatapat siya'y baka itakwil pa

Nasa dulo na ng dila, ngunit muling nilunok

Paano niya lalampasan itong pagsubok?

Mag-mumukmok na lang ba siya sa sulok?

O narararamdama'y tatabunan ng alikabok?

Sinubukan ring magtapat nitong isa pa

Ngunit nang magsasalita na'y biglang naalala

Baka pagtingin sa kanya'y mag-iba pa

Baka kamuhian siya ng kaibigan niya

Pinigil ang sarili, pinag isipang mabuti

Ang lihim kaya niya'y paano masasabi

Ang pagtatago yata ay mas makakabuti

Pero pagiging totoo ang kanyang pinili

Sa muling pagkikita'y malulungkot ang mata

Halatang may bigat sa pusong nadarama

"May gusto akong sabihin" nagkasabay pa

Si lalaki at lalaki sa pagsasalita

"Gusto kong sabihing gusto kita"

Wika ng isa na may halong kaba

"Gusto ko namang sabihing gusto rin kita"

Tugon naman ng isa pa na may ngiti sa mukha