Ulan

Nakadungaw mula sa gilid ng karimlan

Sinasabayan ang pag-awit ng ulan

Kakaibang bugso ang nadarama

Silakbo ng puso'y di maihulma

O giliw ba't ba tayo pinaglayo?

Tila binaha na't di makasulong

Nakasilong, narito't di makahayo

Bagyo ng damdaming kay hirap isuplong

Marahang hinihintay ang pagtila

Nakapagtanto, subukan waring paglaya

Lunurin ng luha't tubig ang mga mata

Sabagay, ang ulan ay may katangi-tanging ganda