Silong

Maulan noon at ika'y aking hatid-sundo

Sumisiksik ka pa nga sa ilalim ng payong ko

Di alintana kahit tila basa na ang buong katawan,

Sapagkat kay sarap ng init kapag ika'y aking tangan

Matumba-tumba pa nga tayo dahil sa baha

Ang hirap kayang maglakad habang inaalalayan ka

Tapos bigla kang hahatsing dahil sa lamig

Yayakapin ka't madarama ko rin ang iyong pintig.