Moonlight Flits
M O O N L I G H T F L I T S
Dala ang pait ng nakaraang buhay,
Isang babae ang muling isisilang.
Sa kaniyang mga ugat ay nananalaytay,
Dugo mula sa magkaibang nilalang.
Taglay ang lakas na kinaiinggitan,
Sinumang sumalungat ay mapapaslang.
Mga sangkot sa naranasang kasawian,
Mananagot at magbabayad ng utang.
Pag-iibigang naudlot noon,
Muling dudugtungan ng panahon.
Ngunit mananaig ang paghihiganti,
Sa mga pusong puno ng pighati.
Sa lilim ng itim na mga ulap,
'Di matatanaw ang alapaap.
Hahagkan ng dilim ang liwanag;
Kalungkutan ang tanging mababanaag.
Kasabay ng pagpatak ng ulan,
Isang digmaan ang magaganap.
Iba't ibang layunin ang tangan,
Karamiha'y mananatiling pangarap.
Ang pag-iisa ng kambal na buwan,
Tanda ng pagsisimula ng katapusan,
Ng abang nilalang na biktima lamang,
Ng mga taong uhaw sa kapangyarihan.
Dahil sa isang propesiya, nagulo ang buhay ni Heather. Lumaki siya sa isang marangyang pamilya ngunit kahit kailan ay hindi siya itinuring na kadugo ng mga ito. Malupit ang mag-asawang Montrose sa kaniya. Kahit ano'ng gawin niya, hindi siya makuhang mahalin ng mga ito at ng nakatatanda niyang kapatid na lalaki. Walang gustong makipagkaibigan sa kaniya. Kung mayroon man, nilalayuan kaagad siya ng mga ito kapag nalaman na isa siyang Montrose.
Dala ng matinding kalungkutan, bata pa lamang siya ay ninais niya ng mamatay. Ilang ulit niya ng tinangkang wakasan ang kaniyang buhay ngunit lagi siyang nabibigo dahil sa misteryosong lalaki na palaging nagliligtas sa kaniya. Hindi niya inaasahang makakahanap siya ng dahilan para patuloy na mabuhay. Nais niya itong makilala. Naniniwala siya na may dahilan kung bakit siya nito pinuprotektahan mula sa tiyak na kapahamakan.
Sa paghahanap niya ng kasagutan, maraming lihim ang mabubunyag―mula sa tunay niyang pagkatao hanggang sa katauhan ng tagapagligtas niya. Marami siyang makikilala na babago sa takbo ng kaniyang buhay. Mararamdaman niya kung paano magmahal at mararanasan niya rin kung gaano kasaya ang mahalin. Ngunit kung kailan ninais niya ng mabuhay, saka niya malalaman na siya ang babaeng tinutukoy sa propesiya na magdadala ng kasawian sa mga bampira.
Paano niya tatakasan ang kapalaran kung ang lalaking inaasahan niyang magliligtas sa kaniya ay siya palang naatasan na tumapos sa buhay niya?
acoscuro · Fantasia
Classificações insuficientes 
