Ang Lu Qiao Couple (20)

Ito ang unang pagkakataon na nakita ni Cheng Yang na nagkaganoon si Qiao

Anxia kaya bigla siyang natigilan bago siya magtanong sa sobrang pagaalala,

"Bakit? Masama ba ang pakiramdam mo?"

"Hindi… Ayos lang ako." Nakangiting sagot ni Qiao Anxia habang umiiling.

Nakakakutob na si Cheng Yang na may mali pero pinili niyang magpatay

malisya kaya sumagot lang siya ng isang simpleng "oh" at hinawakan niya ang

kamay nito, "Tara, kain na tayo."

Sinilip ni Qiao Anxia ang mga pagkain na hinain ng kanyang boyfriend at

kagaya ng nangyari noong sumilip siya sa steamboat, muli nanaman siyang

nawalan ng gana kaya bigla siyang kumalag sa pagkakahawak nito at sinabi,

"Hindi nga ako gutom. Gusto ko na talagang matulog. Kung gutom ka, ikaw

nalang kumain."

Hindi makapaniwala si Cheng Yang sa mga ikinikilos ni Qiao Anxia kaya gulat

na gulat siyang napatingin dito. Gustong gusto niyang itanong kung anong

nangyari pero mukhang hindi naman ito handang magkwento kaya bandang

huli, hinayaan niya nalang ito at tumungo, "Ah ganun ba. Sige, bubuksan ko

nalang ang shower para sayo."

"Wag na. Ako nalang." Mahinahong sagot ni Qiao Anxia.

Habang sinusubukan ni Cheng Yang na makipagusap, lalo niya lang

nararamdaman na may mali kaya ngumiti nalang siya at tumungo, "Ah sige…

mas mabuti nga kung magpahinga ka nalang muna. Iinitin ko nalang yung

pagkain kapag nagutom ka."

"Uh huh" walang pagtutol na sagot ni Qiao Anxia.

Kagaya ng nakasanayan, yumuko si Cheng Yang para halikan ang pagitan ng

mga kilay ni Qiao Anxia pero noong sandaling iangat niya ng bahagya ang

kanyang mga labi sa balat nito, bigla nitong hinawi ang kamay niya na

nakahawak sa braso nito at umalis.

Ano bang dapat niyang maramdaman? Kanina pa siya naghihintay na lumapag

ang eroplano ni Qiao Anxia at sa kagustuhan niyang sabay silang kumain, tiniis

niya ang gutom pero sa mga ikinilos nito, paano pa ba siya magkakaroon ng

gana? Hindi niya rin alam kung anong nangyayari pero isa lang ang malinaw

sakanya: hindi sila okay. Nasasaktan lang siya sa tuwing iniiwasan siya nito

kaya hindi muna siya sumunod sa kwarto at halos kalahating minuto pa ang

lumipas bago siya tumayo sa kinauupuan niya. Binalot niya sa aluminum foil

ang mga binili niyang pagkain at itinago ang mga ito sa thermal box bago siya

pumasok sa kwarto.

Pagkabukas niya ng pintuan, nakita niya na nagmamadaling itinago ni Qiao

Anxia ang phone nito sa ilalim ng kumot at pumikit.

Hindi niya inaasahan ang maabutan niya kaya ilang sandali rin siyang natigilan

sa pintuan para pagmasdan ito. Sa pagkakataong ito, gustong gusto niya ng

komprontahin si Qiao Anxia pero kabisado niya ang girlfriend niya at alam niya

na kahit anong pilit niya ay hindi ito magsasabi ng totoo sakanya kaya bandang

huli, pinili niyang magpatay malisya nalang at dahan-dahang maglakad

papunta sa gilid ng kama. Hindi para matulog kundi para magpanggap na wala

siyang nakita at kagaya ng normal niyang ginagawa, kimumutan niya ito bago

siya dumiretso sa CR.

Pagkalabas niya ng shower, pinatay niya ang mga ilaw at dahan-dahang

humiga sa tabi Qiao Anxia. Para mapanindigan ang pagpapanggap, pumikit

siya kahit hindi pa siya inaantok.

Hindi niya na namalayan kung gaano na siya katagal na nakapikit noong

naramdaman niya na dahan-dahang dinudukot ng katabi niya ang phone nito

galing sa ilalim ng kumot at kahit na nakapikit siya, naaninag niya pa rin na

umilaw ang screen nito.

Matagal din bago nawala ang liwanag at sa kalaliman ng gabi, napalitan ang

katahimikan ng mahinang hikbi mula sa babaeng nakahiga sa tabi niya…

Gustong gusto niyang sumilip at itanong kung anong nangyari pero hindi niya

rin maintindihan kung bakit idinidikta ng isip niya na wag dumilat at magpatuloy

sa pagpapanggap na tulog…

Matagal bago tumigil ang hikbi at wala siyang ideya sa kung anong ginawa nito

sa pagitan pero ang sunod niya nalang na narinig ay lumalim na ang paghinga

ni Qiao Anxia, na nagpapahiwatig na nakatulog na ito ng mahimbing. Ilang

sandali niya pa itong pinakiramdaman bago niya idilat ang kanyang mga mata

para silipin ito. Sa tulong ng liwanag na nanggaling sakanilang dim light, kitang

kita niya ang namumugto nitong mga mata sa kakaiyak.

Napalunok siya at napatingin sa phone nito. Hanggat maari, ayaw niya sanang

panganuhan si Qiao Anxia pero bilang boyfriend, hindi naman maalis sakanya

na magalala kaya matapos ang matagal na pagdadalawang isip, dahan-dahan

niya itong kinuha sa pagbabakasakali na makakita kasagutan. Inenter niya ang

passcode at hindi niya inaasahan na tatambad sakanya ang profile ni Lu

Jinnian sa Weibo.

Nakazoom ang latest post nito na: [Excuse me, Mrs. Lu, masarap ba ang

marriage certificate natin? @Qiao Anhao]

Kahit saang anggulo tignan, hindi maikakaila na kahit maikli lang ang post na

ito ay sobrang sweet at dagdag pa ang personalidad ni Lu Jinnian na kilala

bilang suplado kaya kahit sinong makabasa ay ramdam na kakaiba ang saya

nito.

Pero siguro bilang ate ni Qiao Anhao, buong magdamag na umiyak si Qiao

Anxia sa sobrang saya…

Kahit anong sabihin ni Cheng Yang sa sarili niya para makumbinsi siya na wala

dapat siyang alalahanin ay hindi pa rin siya mapanatag. Alam niya ang

limitasyon niya bilang kasintahan kaya palagi niyang binibigyan ng personal

space si Qiao Anxia pero sa pagkakataong ito, hindi niya rin alam kung anong

pumasok sa isip niya at gustong gusto niyang buksan ang Contacts nito. Hindi

naman normal na humanap ng ebidensya sa Contacts pero para bang may

kumukontrol sa daliri niya na magscroll lang ng magscroll hanggang sa makita

niya ang pangalang "Mahal ko." Kampante siya sa kung anong makikita niya

kaya tinap niya ito pero laking gulat niya na hindi sa kanya ang number na

nakaregister kundi sa isang number na sobrang pamilyar sakanya…