1 MOHBBAT!?

Me mohabbat karna chahti hun ...

Sachi mohabbat jisme kisi jhoot ki amaizash na ho , jisme kisi cheez ka koi khauf shamil na ho ... Afsaanvi mohabbat , deewani mohabbat ...

Uski hansi mery murda jism me jaan phonk dey or me is baat ka aetraaf us se bagheir dare kar du ..

Uski awaaz se meri nass nass dharak uthy or ye baat me usey keh saku ...

Me usey bata saku ke ye jo tumhary kurty se cologne ki mehk meri saanson tk utarti hai na ye meri dharkano ko muntashir kar deti hai ..

Or ye jo tum muskura ke mujhy apny sawalaat me uljhaaty ho na mujhy bara acha lagta hai , mera jee chahta hai me yuhi nadan bani khari rahu or tum yuhi mujhsy izhaar e mohabbat ka nagma sun'ney k lye beqarar huye jao ..

Me usey bina jhijhak keh saku ke tumhary hony se he to me hun , tumhari zaat se he to meri zaat mukammal hai ..

Tum jab nahi hoty to khuda ki kasam me bhi nahi hoti .. Tumhary bagheir to me kuch hu he nahi ..

Mera boht dil chahta hai me aesi mohabbat karu bagheir is khauf ke ' ke meri is bepanah mohabbat ki dastaan sun ke wo khud ko khuda na samajh bethy .. Wo meri mohabbat ko for granted na ley saky , wo mujhy apni baandi na samajh bethy , kisi ounchy darbaar k bahar hath me khaali kasa liye khari bhikharan jo sirf mohabbat ka sawal karti hai , jiska dil or khali kashkol sirf or sirf mohabbat maangta hai ..

Aarzoo Shaikh!