2 Ing Dípáningpálî

Ganingaldó pa. É ka makápiú king óras, ónéng masálá-sálá nang bagiá aniá malápit na king óras na ning pámanaslag na ning aldó.

Mílíngat ya ing báyuntáwu king lisángan.

"Dáná.." ngána. Métudtud yang pákakérá king kéyang atian kábang makayarap ya king wanang sépu na ning pápag nang makapékat king pader. Aniá aniang átalán né ing kayang sálû, méngapamulálá ya úlí na ning mabasá ya ing dáké nang aita ning kayang málan.

Píniling ya at íkit néng pákapatdá ing blówer a métung at kapitnang métru mú ing láwut king págkérán na.

Mitdá ing kurienti. É na bálú nung makanánu na kaluat, ónéng agpang king basá king málán na, lúpang lagpas na king métung a óras ing mílábas.

King normal mung aldó, é magsilbing probléma ita para kaya. Ónéng puyat ya ing báyuntáwu. Kapitngang [kapitángang] béngi né kasi métudtud úling mámiálung yang alang patúgut king kéyang compiúter. Bísá ya pang matudtud. Ónéng búlán na na ning Máyu aniá é maliáring matudtud yang é maka-blówer úling magisá ya king saríli nang páwas king pálî.

"Kanítang Jánwari [January], sásaingsing kung sásaingsing úling pané kung migigísing a mángalunggung king dimla na ning Amíyan. Ngéni naman é ku mipat'tud masalésé andiáng páka-blówer ku úling ing blówer mismu mángisnáwa yang mapáling ángin!"

É ya masanting pánamdaman ing báyuntáwu king mabasá nang málan, aniá még-desisiun yang lakó na né ita. Kalakó lakó na kaníta, bérónggá né at saká ya mísalálac kétang kayang blówer a pákatuknang. Kaibat migkérá yang pasibáyu káyi migpiak ya báng subúkán nang matudtud pa, bistáman mapálî.

Kaibat na ning limang minútu, mílíngat ya úling pánamdamán nang mabasá ya ing kéyang págkéran. Ing sapín na ning kayang foam ampó ulun, mabasá lang paréwu. Mánúlú na ing páwas na.

"Aydúná!! Nán' na wáring óras ó'bákit kapálêêêêêêêêêê?!?!?!?!?!"

Inális né ning báyuntáwu ing kayang láwé king kayang órasang de-batiria. At saká né méngabaligó king íkit na.

"Oybá oybá oybá!!! Alí ya pa naman dápat suslag ing aldó king óras a ini yé! Dápót ngéni ó bákit kapálê?!"

King kayang kaburiang iláwus ing kayang pámanudtud, kayábé na ning samá na pára king kapaliang máglablab, pípiling piling yang alang patúgut king anggang pílatán na ning kayang kuártung mégin anti métung a kalang.

"Dána namán, ótot nánung?! Óbat rugú makanyan pané né?! Nung kapilan a panawung kailángan méng ustu ing blower, karin da pámatén ing páááwer!"

Lálus yang masosórâ. Ngára pin ding mattua, "mé-áibulád [mé-highblood] ya", mitatas ya dáyang é óras. King ísip na ning báyuntáwung kapmung lukámî, pákasamán na né ing banua, úling péburén nóng misanmétung ing pálí ampó ing púyat na.

"Ááááááááááááhhhhhh!!!!!!!!!!!!! Máyápang mét'tud ná kú mung maránun ing altî!! Áááááááááááááhh!!! Nánu wáring masanting kétang piálung aita ó bákit ké mó pámuyátanan?! Ááááááaááááhhh!! Tuknangan ku né ping papialúngán! Mákalukámí yang mákasumáming mákasórang é mu bálung sabian a mákasírang pángatáwu."

Mémyálung ya kasing Genshin Impact.

"Asná kung pámagkákasákit páipagal mámateng monsters alang patúgut bá kung makápanípun primogems, tang káyi pótang mag-wish ku ing altî, alá la mang silbi réng bibié ra kanákó?!?!!!? Gáááááááá!! Aydúrang gacha games dén."

Ing tutú na níyan, métudtud ya nabénging masakit lub o sabian tá na móng, masúkal a lub a súsukdul king banua, úling é ya mékánakuang 5-star item, ing pékamátas a rating kéng Genshin Impact.

"Ááááááááááááhhhh!!! Káyi kaibat mung mamiálung, asná ka pang kasakit a bátal king káka-compiúter mung atlung óras. Ááááááááááááááá!!!!!"

Kábang alá yang patúgut sásaingsing ing báyuntáwu, alá yá namang patúgut mánúlú ing páwas na. King andat minútung milalábas, bábasá yang bábasá ing págkérán na.

"Áááaááhhh!! Óbat naman kasi pala kamalásan kó né? Ing kuártu ku, ampó réng áwang na, makayarap la king Bunduk Aláya, nung nú ya saslag ing aldó patié ábak. É ná ku mángailángang alarm clock, ing pálî at sálá na ning aldó, ílang mángísing kanáku ábak ábak. Hmmm, ónéng késanting na naman níta pané kung 'táwu na ning dánun', 'morning person' ngára king Inggulis [English] né?"

Síbúkán na mang lumáwé king késanting na ning kuártu na, líwas king késura na níni, tambing mú ring mélasak ing pámanlaláwe nang aita úling tínagaktak na naman ing páwas king mabílug [buû] nang katáwan, bistáman lékó na né ing kayang camiséta.

"Áááááááááááhhhh!! Alááááá palang masanting king kuártung makatúlid king tuknángan nang Bápung Sínukuan... Kapáléééééééé soyk!!!!! Ááááááhhh sána kagísing ku búkas Disémber na. Andyáng magyélu ku pa king dimla, é ku mú sá magigisang mabié king pálî!!!"

"Gááááááááaá, wóy Pelco, kapilan yu bálik ing páwééééééér á nááááá???!!! Mákasumámí na kayung taganá né, óbat pané da rugung pámatdan ing kurienti, bálú ra nang ngéni té kailángan a kailángan ing kékatámung electhriiCC pÁN!!"

"Wáááááá, kasáman kó réng maka-haircon. Kasuélu da kanyan détá né? Sésélán nó mú buldit ngéni kanyan. Bagyá da né mú é kápad! Andyáng pang mitdá ing páwér, é la kanyan mánagaktak páwas úling atin pa mú ring mitatágang dimla kéng kuártu ra. É na pa ikuang linual ning haircon da!! Haaaaaaaaaaaaaaaa,,, mángalálu [mágsélus] ná ku mang sóbra karéla ngéni. Sabian ku ná pin kang Má kó, sálí na kaming haircon, tang inverter type pa báng balámu pang makuálta, ché!!"

É ya pa kinimut o gínaló ní bagiá ing báyuntáwu, bistáman makakérá né king kayang páwas ngéni. Úli kanung lálus yang mamáwas nung gáló ya. Ing sangkan na níyan úling ábálú na king Biology lecture dang gágáwa yang pálí ing katáwan pótang mág-exercise támu. Ónéng é yá rin makapiu, king tutú na níta.

"Gááááá, é la sá manyaman a asan déng maka-haircon ngéné. Kúlang ya sá bulug ing karélang galgaréta at mattuá yang bábí ing ásálí ra bá yang masyas a masyas andyáng pang pakálágá ré mán!!!"

Pámulísán na ning báyuntáwu ing kayang pawas king kanuan gámit déng míngatbá nang takdé úling alang patúgut mánúlú ing kayang páwas.

"Áááááááá, Guinú kung mayupáyang maganakang alang kalúpa nínuman, malúnus kó pú karéng kalúpa kung alang haircon at gáwá na kayung parálan báng misindí na ing kuriénti. É ku na pú agyú! Mángákú ku pung maging maganaká ná kung anak at é ku né papanwásang pípanganan i wáli ku pané pané."

Sasabián na ita kábang pákakérá ya pa mú rin at saká nó pípékat déng kayang pálad báng mangaddî. Ing tutú na níyan, adduá néng banuang é tátalpak king pisamban ing alang maríné.

"Oy kóyáng!! Mélúsé na ká tá't mémúrit a é ku bálung sabian, nandin mé pa pák'sabian ing saríli mu, núkó yáy!"

Mípaláwé ya ing báyuntáwu kétang dimdam nang siwálâ [bósis] - ibat ya ita pala king wáli nang babáyi. Kaláwé na kang wáli na, méngapamulálá né mú úling íkit nang é mapáwas i wáli na, kumpara kayang mánagaktak na king páwas a é mu bálung sabian.

"Oy, Gánggáng, óbat ká-fresh mung lálawén ná? Táwu kang taganá? Ó póta bampíra ka pala?"

"Náááá??? Kóyáng, késirán na ká 'tá rugû?? Kadáyá mu kú mû, nung matsúra ku, más matsúra ka. Nung bampíra ku, ódi bampíra ká naman, alê?!"

"Alí murét! Aliwá ita. Ing ámanuan ku, óbat é ka mánagaktak king páwas a kalúpa ku? É wárí mitdá ing power ing altî?"

"Nááááá??? Ná'ng mitdá naman rugú Kóyáng?! Kanyáman ku pin a tudtud é! Ménínap ku pang súsulagpó ku kanu, asnó kábá réng bagius [wings] ku kaibat kúlé lang mairó!! Kasanténg né, bísá kung makan'ta king tutung bié yáy!"

"Náá?? É mitdâ? Nung makan'ta óbat é ya makasindí ing blower ku???"

"Báy, Kóyáng, tabálú kéka yáy! É mu wárí léwén nung mitdang tagana ing power ó alî? Póta galáng kanyán é na ka nanaman tínikdó báng lumáwé??"

Méngapagatal né mú i wáli nang babáyi king buntuk king díné na pára kang Kóyang na.

Línápit ya ing wáli kétang extension cord king lálam na ning pagkéran, nung nú ya makasaksak ing blower kétang métung karétang outlet na níni. Makasaksak ya ing extension keng saksákan king lélé na ning pagkéran. Síniklaud [had kneeled] ya ing wáli at saká né lináwé itang makasaksak keng extension.

"Lón [Lawén] mu yó! Pákabagut yang bagiâ, anyá é ya bísang gumána ing blower mu. Tíran mé sigúru né?"

"Náááá?? Makaná'n kéng tíran yan, é ku pa man tínalakad. Bá bá bá? Mitdá pin kasi ing power ót nánung!"

"Kasias mu buntók né Kóyáng, ódi sána nandin ku pa naman susyó kéning asná kung kalisángán! Málé ku kéka yáy! É ná kú mú bísang mag-talk, ché!"

Linual né ing wáli na king kuártu na at álabásán né ing métung pang babáyi kábang lulual ya. Papalub ya ing babáying aini king kuártu.

"Abáy, mígísing na ka pala né chong? Dánun mu ngéné ná? Ná'ng atin? Bágus kaníta migigísing ka pótang magtú na ké ngan rugû."

"Bá i atsí kó, é ku wárí migísing king dípáningalting páling aini a mégpanagaktak a páwas kanáku yáy? Núku namán."

"É ka wárí még-blower áy?"

"Ódi sána é ku mánagaktak páwas ngéné."

"Katipid mu namán, wáli kó. Magblower na ka béngi béngi sigé. Yákung atsí mu na ing mamáyad king kuriéntí támu anyá é na ka migáganakâ."

Mésórá niá mú láwé ing báyuntáwu kétang dimdam nang aita. É ya sásalésé kapanamdáman úling pápálí yang pápálí ing kuártu na kábang balábaláwus yang tátas ing aldó king kayang pámanaslag king ábak.

"Ampó pala, rugú namán, Chíkung wáli kó, ót é mé rugú linísan ing bányú mu king kuártu naman áy?"

"Ná, bákit?"

"Minímí ku nanding ganingaldó kén kasi tátaklá ya i Gánggáng kétang bányu king kuártu mi. Núkóó, kayákit ákit ku balámu rugú naman tuknángan yang bábî! Ót é mé rugú linísan andyáng bagiá mû?"

Ménibáyu ya láwé lúpa i Chíkung báyuntáwu king dimdam na. Balámu mélukámí ya. Méngapapiak ya matá ampó makasakmal ya ing wanán nang gámat.

"ÁÁÁÁÁÁÁÁÁÁÁÁÁÁHHHHHHHHHH!!!!"

"Áhh?? Á nánu?"

"Íka pala ing sangkan!! Íkang sangkan nung óbat mitdá ya ing blower at mémanimáwas kung makaníni!!!"

"Ná?????"

"Tíran mé kanyan anyang lálákad ka king kuártu, anyang papuntá ka bányu ó anyang pabálik ka. Gáááááááá!!! Ót é mu niá mú kasi pénáyan mayárí i Gánggáng kétang bányú yu bá sáng é na ku mémagkasákit makaníni, núku namán áy!!"

Bistáman mimuá néng bábátak i Chíku, é ya pa mú rin tínikdó king pagkérán na. Gúgulágulábak ya kang atsí na kábang makakéra ya king gúlut na.

"Arg!!! Nung é kú mú puyat, nung é kú mú malalásó king páwas, nung é ra ká mú atsi, pékawalá ná kung muá ngéni!! JSdhsakjh$322oASIDua!!!! Atsí ra ka kanyán náááááááá?!?!?!?! Do I not sound family, huh?! Gáááá makó ná ku yátá king báléng a i-"

At kábud yá mú míbálik king kuártu ing wáli rang magégé manialítâ.

"Kóyáng, kóyáng!!! Tara kapé, gehehehehehehe!! Méglútú yang kapé i Mámáu, détang pédalá nang Dárang Diane a kópi bins [coffee beans] ibat Mér'ka [America]!!!"

"Abáy abáy, nánu pang pánáyan támu yáy!", pakíbat na ning kóyang a mánagaktak a páwas a é mu bálung sabian rugû.

Makanánu man kapálí ing panawun, é ya makáyalí king kapé. Lakuas [Lálus] na pa nung linútú ya ita, 'brewed coffee' ngára yátâ, á né?

Ing atsing méngakamuánan at méngasérmun, méngapamulálá niá mú rugú karing mangalaguang pámagbáyu karing malaliári. É ya sigúru kínimut andyáng bagyá king lugal a kayang tatalakaran king kuártu, sangkán na ning kayang asdan [shock, surprise].

"Íkang é family? Murét. Yáku yátá ita yá. 'Núkó. Mángapakutang ná kú mû, nung anak ná ku mó taganang Imá kung Terésa."

Maibug né mú rugung gumágá ing pangáné.

"É rá ku man kitnángan ding wáli ku nung bísá kú namang minum kapéng sosiálin.."

Sémásán né ning atsí ing pángasaksak na ning blower kétang extension. Línukluk ya king pagkéran, at tambing yá rin migkérá king gúlut na. At saká niá mú mémagkasat ing babáyi king pagkérang sásabó, kábang maligáya lang mágkapé rétang adduang mikóyang.