4 Déng Miyatsi

Línual né ing pangáné king kuártu. Mánagaktak ya páwas a balámu igsénan déng métung tábung danum. Ikuá na nang mípékat ning susúlud nang kóton [cotton] a camiséta king kayang katáwan. Balámu méglúpa yang mas madalumdum kúlé ing susúlud na ngéni, úlí na ning mítípun a páwas king málán na. Kábang lúlual ya, makatukbá ya buntuk a balámu kégisanán néng kapagnasan king bié na. At naturál, mabasá ya ing buak nang balámu kákabat na páng méndílû. Ampó mú rin ing salól na mípékat né karéng puad na úling mébasá ya naman ita king páwas na.

Milélé lá mú ing kuártu da ring miyatsi ampó ing kuártu nang Chíku (miyábé lang kuártung Gánggáng). Mitúlid la ring pasbul da. Lálakad ya i Gánggáng pabálik king kuártu ra. Álabásán néng Gánggáng i atsí na kábang lúlub ya sána king kuártu dang atsí na. Mípalundag ya king tákut anyang íkit né i atsí na úling é ya pa méka-move-on king pámangamuánán nang Chíku kaya, anyá mémaligwá ya ining lungub king kuártu rang miyatsi.

(Hmm? Rugú naman ó't katákut na kanákó? É kú pin átá túné anak kéning pamilyang aini. Sigé na sigé. Tanggapan ku niá'yta.)

Mípasusyó niá mú ing atsi at lináwus na niá mú ing pámaglakad na pasálas. Karin íkit né i Chíkung mámalamang pínat báttér [peanut butter] kétang tinápé na, panalmusal na. At syémpre, pákatúlid ya kaya ing blówer a maka-námbér 3. Makalukluk ya i Chíku kétang bangkung makatúlid king tv. Ating lamésa king arap na ning luklúkan at karin la makakaná détang pipánganán na. Mánalbé yang tv, nánu pa mó né?

Masikan sikan yang bagyá ing tv anyá é né dimdam Chíkung lálápit i atsí na. É niá mú ring áulatang makalélé yá mu king bangkú na. Inális néng Chíku ing channel king tv, mípasáktu ya kétang alang signal anyá méngapagámus yang bagyá buntuk. King pámangámus na, karín na áulatang makalélé yá mú kaya i atsí na.

Mípalundag yang bagyá i Chíku king luluklukán na úling mákapakirut yá pin namang láláwén i atsí na ngéni.

"Ay Jós kó! Balá ku sá mégín néng tutú itang áyalbén kung óror [horror] anyang mísan! Misdan ku kéka."

"..."

"Mípakanánu ka rugú tsé ó't balámu rugú méwalán na kang pagnasan king bié mu?"

"..."

"Ó kéni rugú lukluk ka pâ. Kapáwas mung makanyán?"

Línukluk yá pin ing atsi ónéng balámu méngapilítan yá mû. Misíping lang miyatsi. Pémanális néng Chíku ing tv báng makápantun yang burí nang albén.

"Ó't rugú balámu yáku ing wáli kéni ngéni ná? Ausan da na kang "kóyáng" kanyán?"

"Kabud kabud naman pákiapúsan mé i Gánggáng..,,,"

Mípasnó yang bagyá kapanamdáman ing atsi ngéning atí né king mayángin. Makaláwé la king tv réng matá nang anti king métung a mété. Mákiyalbé ya mó kanu.

Ónéng ing kapasnawán nang aita mayárí mú rin tambing, úling kabud ná mú ating kínuláyit gúgulísak king lagyú na.

"Oooooooooooyyyyyyyyyyyyy Sáisái! Atiú ka kén? Syémpre atiú ka né. Sálí na ká péng tóyú kéta kang Dára mung Madéng! Manaróbu támu pára pa'gtuan."

(GhkSKgHHkk, bísá ku pá rugung magreláks kéni yé...)

"Ooooyyyyyyyyyyyyyyy!! Sái! Laguá mu na! 'Té ka mákíbat áy!"

(gÁÁÁRkSHG)

"Óy tsé áusán na kang Mámâ. Sálí ka kanu."

Lináwé néng marók a matang Sáisái i Chíku.

"Íka ping pásaliuán nang Mámá e! Papása mu nanaman kanáku....!"

At kabud kabud na lá mú ménaliwá réng matá nang Sáisái. Mégin lang mapagmakalúnus ngéni. Kaibat sikmal nó réng adduá nang gámat Chíku, kábang lúlúpa yang mákalúnus a itsúra.

(Hááááááá??????????)

"Háááy! Wa na, sigi na, yáku na sigé."

Míkatíman ya lúpa ing atsing pangáné. Balámu mésálá lá mú kabud ding adduá nang télatáwu [pupils]. Ing kanítang lúpa nang máglupang migkasat patingápun, ngéni lúpa néng migkasat mung adduang óras.

"Antayu Mâ! Yáku ná mû!"

Tínalakad ya i Chíku kaibat migpakusíná ya.

"Ó áwaréné yó. Sálí kang tóyû. Ikuá yu néng ágísan king pámaniltílan yung kalamunding e."

Kinuá nóng Chíku détang péra at saká né mékó king kusínâ. Ónéng imbis na lumual ya balé, línákad ya papunta karing kuártú ra. Méngapamulálá niá mú i Sáisái.

(Ná'ng gáwán na níní?)

Mintá ya i Chíku kétang kuártu da ring miyatsi. Anggá yá mu kétang lélé na ning pasbul.

"Óy Gáng."

"..."

Lináwé né mung Gánggáng.

"Sálí kang tóyú kéta kang Dárang Mading."

"..."

Makaláwé yá mú i Gánggáng kaibat minakmul yang wáwâ.

"Maglútú yang aróbu i Mámâ."

"..."

*akmul*

Tínalakad né i Gánggáng at línákad né papalual king kuártu. Kinuá na lá mú kabud détang péra kaibat dínarétsu né rin papalual balé.

Migbálik né i Chíku king sálas. Línukluk yang pasibáyu king síping nang atsí na.

"Woy, balá ku sáng íká nang sálê?"

"Bá, pinása mé kanáku, anyá pinása ké kaya. Bungsú ya e, alá néng ápasan! HAHAHAHA!"

"Bálú mó, ísípan ku ngéné nung tutú tá mó taganang mikákapatad."

--------------------------------------------------------

Lálákad ya ing dalagíta papunta kétang tindángán nang Dárang Mading. Kaibat ating gínulísak a mattuang laláki kaya. Lúpa néng ati king singkuénta. Makalukluk ya ita kétang luklúkang siméntu king lélé na ning tindángan, pákabilak ya puad at saká ya makapariking a makasandal kétang padér na ning tindángan.

"Wóy Gáng, karagul mu na palá né?! Kómusta ka nang? Ngéni da ká íkit línual ah?"

"Ay Kóng Jok, kómusta. Pásaliuan dá kung tóyú e."

"Áááááhhh, é pa man mémuklat i Dára mung Mading e. Mémaléngkí ya bálú ku."

"Nung makan'ta Kong, ó't karánun yu namang mágdatun kén?"

"Nang lisángan balé káyi sínáwá ná ku karing áyalbén ku king tv."

Sínaldak ya pangisnáwa i Gánggáng, úling ing tindángán nang Dárang Mading ing mágdíling tindángang malápit king balé ra. Áísip nang kailángán na pang munta king talipapá kaníni bá yá mung makásaling tóyû.

(Grhkkkk, makamuánan ku kaníni úling magluat ku pa.)

"Kong, malyári kung mandam bike?"

"Muntá ka talipapá né. Áwainé yó. Lagyú na níyan 'Chámchám'."

(Chám...chám....???)

"Ariwá ka né Kong. Enlesláb [endless love] yá mú káyi pélagyuánan mé pá?"

"Abá abá, é mé pi 'yá mû' 'yá mû' yan!! Mattuá ya pa kéka yan, balám' galáng! Hahaha!!"

"Ósyâ. Manyalí ku pá báyú ku pa mangakamuánan."

"Wa sigé, kéni kú mú naman angga pinandit."

Pildak néng Gánggáng itang pánalakad o stand na nítang enlesláb bá néng sakén. Mékó ya tambing tambing. Ónéng biná yang mátas pára kaya itang luklúkan na ning bisikléta anyá kailángán nang tálakad kábang pápaldak ya.

(....Mákapagal naman ini. É ku makápag-chill ride mú yáy!)

"Kaláwut na pala ning talipapâ, 'dô! Máyápang línákad ná kú mû, tutal makamuánan kú rin úling magkalwat ku.."

"'Dâ, ákalingwan ku pala atin pang tété. É ku pa man rugú mégalmusal é!"

King kabuisítán na, é niá rin gínégé, mílakó né pángaprinsésa.

"Mákasórá ya i Kóykóy. Yáng útúsán nang Mámáu káyi kanáku na pégawâ!"

"Mámi mámi!! Lón mé'tang babáying 'ta! Mémúrit né 'tâ! Pák'sabián né saríli na rugû!" ána nítang métung a anak a laláking makatalan kang indá na kábang patípá la king tété.

Dimdam nang Gánggáng ing sinábi na ning anak aita. Anyá méngapadukú né mú at méngalútú ya balugbug.

(....kasáman kéng tagana'y kóya ku...)

--------------------------------------------------------

Míras yá rin i Gánggáng king kántu papalub king talipapâ. Ikwá nang sínungá karas na karin.

(Adjlksadjaskf:AJLSFLKA!!! Kapagal ku ná ping makaníné!! Gagáwan da réng táwu'iné?! Káyi muntá la pa Súbic a maka-bike mô, just for fun?!!! Lúsé ká'tá pára gáwan mu'ita!! 'Aydô!)

Kínuldas ya king bisikléta at linákad na né mú ini úling biná lang marakal déng táwung mámaléngki king talipapâ.

"MalaGÔ! Nám' burîîî?!"

"Luglug luglug! Pansit luglug! Sampélut! Lélut! Almusal, mékéni na!"

Mípaláwé ya i Gánggáng karétang mámagtindang pakuan a patung-pátung úling atin yang dimdam a bósis mánibat king masiglang speaker.

"pAkuÁn pAKUÁn!!! sÁLí na kÓng pAKuÁÁáÁÁN!"

(É né rugú mílakó itang recording aitá né...)

(Ay! Sálí ku palang tóyú yáy!! Ó't rugú pápalíli ku karéng paninda...)

Línákad ya pang paláwut i Gánggáng king pámanintún nang tóyû.

(Dáná, ó't rugú púrus gúlé, bábî, manuk, bulig ding ákákit ku... É nó wárí mánaróbú réng táwu ngéni?)

"Oy náng! Nám'pántunan mu, lúpa kang anak a mélíli a ngéni na pá ítúsan má nang mamaléngki."

(Ghksc,, nánu ka dár, maténákang pantas a mákábálú king éganaganá?)

"Tóyú pú dár. Atin kayó?"

"Hmmm awa naman áy. Óiné yó."

Binié néng Gánggáng itang kayang báyad. Makó né sâ, ónéng..

"Hmmm, kapámu ná náng... É na ka anak Tés?"

"Ópû."

"Áku na e! Kalúpa méng kalúpa'i má mu anyang dalagíta ya. O'i kóya mu, kómustá né?"

"Máyap naman dár. Áita mag-college né kanyan."

"Áwa báyuntáwu né ne. Pitakí-takíkí né kanítang má mu kéni anyang anak anak ya pâ. Kalwat ku néng é ákákét. Masanting yang laláki'y kóya mu né? Ikwá nó ngan déng mangasanting dang puling mámá ampó tátáng yu."

(Tsk, súra ná mú nítang tsónggung aita e..)

Pótang daramdamán nóng Gánggáng déng makanítang pisasabian, lakuas yang milalakó pángaprinsésa pámanugálî.

"Osyá dár, múlí ná ku, pánayán na ná kung má ku kanyan. Manaróbu ya e."

"Wa sigé náng. Sabian mu pákómustán né nítang malagung babáyi ámo! Hahahaha!"

Linual ya pá i Gánggáng king kántu na ning talipapá báyú né sékén ing bisiklétang indam na.

Álus pátag mu naman ing dálan, ónéng áganaká nang kailángán né palang panikan pasibáyu ing tété paulî. Más matarik yang ukyatan ing tété king paúlí na.

"...SAJDAslkg;jAKfj!!!! Ó't kasi géwá ré pa'ini yé!! Ó't é tá ná kasi dumálan king sápâ?! Kínabié nó man déng táwu kaníta e!" ána kábang múmukyat ya king tété.

"Mí mí mí! Mámi! Lón mu yó, ya nanaman. Pák'sabián na né nanaman saríli na!"

Dimdam néng malínóng Gánggáng itang anak aitang patipá king tété.

"Ná, náng- ha- ha- ku.. nanaman- ha- ná!! Íka nanaman! Balungúsan da ka kén áh! -ha.."

"Ghrkk!"

Sínalikut né mu rugú itang anak kéng katáwán nang indá na.

(Súsungá ná ku pin, mákisásá ya pa. Déng ának ngéné né...)

Paganakâ: ápat mung banua ing pílatan dang adduá nítang anak a laláki.

At king kákapaldak nang Gánggáng, míras yá rin king tindángán nang Dárang Mading bá néng isublí ing bisikléta nang Kóng Jok.

"Kásungá mó náng? Ó't balámu rugú ngéni ka pá linual naman?"

"Ó báy, i Gáng pala yáy! Nú ka bat nang? Ó't rugú súsungá kang makanyan?"

"Dá..r.. atiú na kó pala.. gaha- ha... sínalí kung tóyú talipapá kasi mémaléngki ka kanu."

"Áááhhh anyá pala álabasan da ka anyang paúlí ná ku nandin. Ináwus da ka lagyú nandin ónéng é mu ku man átá dimdam e. Na ka yátang kápókus king pámag-bike mu."

"Máyápang gílisákan mu ku sá dár... kapagal kó..."

"Hahaha! Míka-exercise na ka man, é'm burê?"

"Ósigi na dár. Salámat kang Chámchám Kóng.."

Minúlí né i Gánggáng karéla. Dínarétsu ya kusiná báng ibié kang má ra itang tóyû.

"Máu yó, in' tóyû..."

Naturál, súsungá ya pa rin angga ngéni.

"Bá yó't kapáwas mu rugô? Íkang sínalê?"

"Wái.."

"Bá i atsí mung Sái ing pásaliuanan ku yé. Káyi pinása na kang kóya mu. Méngaparas ka pa yátá rugú talipapâ."

"Yáh..."

"Hááááy.. katamad da ring miyatsing aréta. SÁÁÁÁÁÁÁÁÁIIIIIIIIIIIIIIIIIIIIIIIIIIII!!!!!!!!!!!!!!!!!!!!!!!!!!!!! CHÍÍÍÍÍÍÍKÓÓÓÓÓÓ!!!!!!!!!!!!!!!"

Mipakirut ya i Gánggáng king biglá nang pámangulísak indá na. Mílakó ya rin átá sungâ.

Linual ya ing indá king kusíná kaibat mintá ya king sálas. Mamaniérmun né sána ónéng íkit nóng makaidlip déng adduang miyatsi king luklúkang dútung, pákasandal la. Mélakuan yang makasindí ing tv, at makatútuk ya ing blówer a #3 karéla.

Mílíngat yang bagyá ing atsi at íkit nó tambing déng matá nang indá ra. Anyá kinalbit né i Chíku bá yá namang milíngat ini.

É ku na siguru kailángan pang sabian nung makanánu lang méngasérmun anyang ikuá dang mílíngat.

...

(Péiborit né taganang mámá i bungsuy né?) ánang Sáisái king ísip na.

(Áwa, péibórit niá ping túné..) áná namang Chíku king ísip na.