10 Chunding Enggau Aki Selumba

-Jerita Jenaka Iban-

-Chunding Enggau Aki Iya Selumba

Tusun ka 10

Runtu ati ka agi ringat, dani pagi nya tumu iya nurun ke ai sungai ka nginti. Ka nginti ku jaku ngica ka ati badu ringat agi. Mulut ka bangur nyau nadai bangur agi. Pulai baka selama mih anak gamal tudah. Tetucum iya dani pagi betinjau nyeremin mua diri ninjau mulut ka bangur. Mina ati iya agi pedis ngenang bini enggau ucu iya Chunding ka enggai bebadu ketawa ka iya demalam.

Simpan iya bekal. Tumu pagi iya nyumai asi ngena sampau mit(periuk asi) ka numbas iya ungkup iya siku. Telu masin direbus dua igi ke engkayu bekal dibai iya nginti. Genap utai disimpan ka bekal iya lalu meresi semua utai dikena nyumai tadi begadai nangi ka ditemu bini iya enggau Chunding. Ngena amat maya nya seduai nya bedau dani.Tembu indah semua utai iya lalu nurun.

Kekejah mih pejalai tudah Selumba nurun nginti. Ngensung ka tiun lagu "lachau bejembi" ari David Kemey.

Enda berasai, enda ga jauh amat. Datai ba sungai alai nginti, iya berati ka lubuk ka manah endur ngetan ka ginti. Umpan dikait ba mata ginti. Ditikau ka tali ginti ke ai. Pia nganti ginti ka bencuk ditagup ikan, iya nyambil nambih ka ginti ba tebing ai.

Tembu ngujak ka tambih ginti iya pan duduk. Tungkun iya insap kesuh ka asap. Kesepul asap pansut. 15 minit bedau ga ginti ditagup ikan. Nyau ka pepedis ga ati nganti lama.

"Eh, nadai utai bakatu. Ta nadai utai lalu. Enda puh iya asai tu...." jari iya nyengkau bungkus insap ka dipangai ba atas batang kayu tumbang alai iya mangai ka insap tadi. Diperati ka iya ga gambar mua ari depan bungkus insap nya tadi.

"ERA BLACK. Nyelaie ga nama insap tu. Enda kala aku tu makai insap tu. Dini enda antu sebayan Chunding nya meli ka aku insap. Nyeee....ta gambar anak mit baru ada bepimpas. Ta dadak nembiak tu meli utai bakatu. Nyangka tu cap madah ka ngajar urang lelaki ka meli insap tu cara mimpas(mampers)ank baru ada kini. Eiit nadai ari ka belajar kenya aku tu. Tembu bungkus balut ka guni kena ngarung buah nangka tau mih. Enda masau belanja...." Selumba bejaku kediri ngilik ka pala agi berati ka gambar anak mit ba bungkus kertas insap tadi.

Kepuas ka bejaku kediri, palik iya ka ginti ke ditambih. Dua iti ginti iya bencuk. Laju kaki disingkang. Tarit iya ginti peda ikan kedebu numbas iya pemesai. Gaga amat ati iya. Mansang ngagai tambih siti, singkang kaki baka ka digagai urang.

Sekali.....

"Bukkkkkk....!!"

Kedebuk munyi ai. Nyin, terengkah ba ai sungai tudah Selumba. Kaki tegelincir ngindik daun ngujung ka labuh ka ai. Nama agi dih, basah mih tudah tuai. Naka pemedis ati. Iya ngangkat kediri lalu niki ke tebing sungai.

"Merinsa udu. Jauh amai salah ku Ajung. Tungkut,  merinsa utai kajuh. Kini ka tau labuh ka ai. Nih....nyau basah anak empulu....."pia ku Selumba mucau kediri.

Mansang iya ngelanda ginti ti deka dilanda tadi. Peda iya ikan semilang.

Seari ari nya mujur endar iya nginti. Bulih amai munyi ku indai Bunya, bisi ka belanja lemai. Pulai tudah Selumba enggau senang ati. Pengeringat ngagai Chunding enggau Kempi nyau enda dikingat. Ati kelalu gaga bulih ikan mayuh.

Kempi enggau Chunding ka duduk ba pala tangga kaki lima sida tebelenga bela beperening pangan diri meda Selumba tucum indah datai. Seari ari seduai meucu nya betanya begiga ka Selumba meda nadai dirumah.

"Nih, nemu ga nya pulai dih. Kumbai aku enda pulai agi meda beganjuh enda nemu bepadah..."ku Kempi bejaku lalu ngemuncung ka mulut nguing ka mua.

"Aihh, dih Empanjau ....kini tunga nuan tadi setaring...? Bejalai enda bebaie. Betinggal pia aja..." ku Chunding ga nanya. Iya sigi landik nempa nama urang dih.

"Iya nama gaga begiga aaaa....? Nama enda meda baul ginti dibai aku tu seduai....? Ta kait ba lubang idung seduai mata ginti tu legi, nyadi ka antin seduai...baru nemu diri....."saut Selumba lalu tama ka bilik. Mua Chunding enggau Kempi enda dipalik sekali.

Tama kebilik lalu ke dapur. Ikan tadi lalu dibela di intu manah. Udah nya disumai indah.  Nama agi dih mujur sida sebuat belauk ikan ulih iya nginti tadi.

Bela nadai bejaku makai. Sama malik pinggai diri. Meda nyau sama sunyi dia Selumba lalu ngepun bejaku. Ngumpan bini iya enggau Chunding bejaku.

"Empa amat ka ikan ulih aku tadi. Kumbai seduai bangat nyamai aku tu nginti nya. Ambis labuh ka ai. Anak cauk nyau basah. Rugi aku nginti jempuk tudah empulu...." ku Selumba ngelagu diri.

"Huk...hukkk....!!"

Enyau sedekan tudah Kempi ninga jaku Selumba. Ka ketawa enggai nyadi. Bejaku enggai ga nyadi. Mata tepelut. Kuyu enggau mua nyau mirah.

"Apuuuu.... lapa nuan ini?pia ku Chunding nanya. Irau ati iya meda mua Kempi bakanya. Kada enda pengkelan tulang kenu ku ati iya.

Agi ga Kempi bedau ulih bejaku. Jari ditunjuk ngagai mangkuk buah maram. Minta ai.

"Oh, sigi sendat leka maram iya tu...jera bangat bam, nyamai....gaji munyi ku Lilly. Uji pandam enggau belakang iya nya Unding...."pia ku Selumba.

Chunding angkat lalu mandam belakang Kempi. Sekali mandam bedau pansut. Kedua kali mandam, pandam iya balat. Pelanting leka marang kena kening Selumba lalu tama pinggai Selumba.

"Akaii.....tu baru iya. Betul betul ukai bebula. Jauh amai salah ku Ajung. Empai aku kala dih apai. Ketawa ka aku kita bangur mulut ketegal makai keladi. Tu baru iya. Betul betul jauh salah ku Ajung. Ta pengkelan leka maram....nyamai gaji ku Lilly...hahahahaaaaahaaa....!!" Ka amat ga Selumba besema ka jaku Ajung enggau Lilly. Sida serumah. Nyau serumah enggau Ajung seduai Lilly tudah Chunding.

Bepecal perut Selumba ketawa. Kempi ka diketawa enggai nyadi ringat. Geli ga ati iya betati ka leka maram ka pelanting ngena kening lalu tama pinggai Selumba. "Jera asai ka ketawa ka aku..lapa enda tama lubang nyawa iya tadi dih...rindu gi meda..." ku tudah Kempi bejaku dalam ati.

Chunding nibuh disebut agi, sigi lalu engkakah. Enyau capuh mih sida sebuat malam nya bela ketawa ka pangan diri.

Tembu makai bebela indah, sida meucu duduk ba bilik besai betunga ka kitil ai kupi. Kupi disalin ka tudah Kempi lalu disadung ngagai laki iya Selumba enggau Chunding.

Chunding ngepun ka randau sida sebuat.

"Aki....nadai pemindah kitai tiga pagila pelaba aku. Kin kitai sebuat pagila ke kebun lada kin...lama amat udah enda kin pengudah nuan ka teberayan labuh ke ai suba...." pia ku Chunding tetucum gaya. Ingat ka pengingat seduai ngambi buah rampu, Selumba ambis teberayan labuh ke ai, perau cecangak maya pulai.

"Nih, ngelagu aku....diri empu lebih agi. Nyau cecangak perau gasak iya...."ku Selumba nimbal.

"Laban bela dadak, nya tau amai ka begulai. Ngakun amai dih apai...!"ku tibak Kempi.

"Eitt, nuan dadak mih enti pia...laban begulai enggau kami duai aki....."saut Chunding. Ukai sigi ka alah ti bejaku.

"Udah, tinduk aram. Lelak bekerakal enggau seduai tu. Utai ilal enda tau dikibuh sekali...medis ka ati. Pagila tumu ke kebun lada kitai tiga. Anang memacam seduai pagila ti enggai aku tingko...."ku Kempi lalu angkat ningal ka seduai meucu ka agi duduk ngirup kupi.

"Nih...pecaya nuan aki....? Bula enggai ibuh, kada enda ringat nya enti enda dipayuk nuan legi dih. Enda arap sekali aku jaku nya... " Chunding nelai pending Selumba lalu ketawa.

"Hahaaaahaaaaaaaa.. !"

Tetucum tudah Selumba ditelai Chunding.

"Enda tuyu enggau nuan nya aku tu. Lelanyah...." ku Selumba nganu Chunding.

"Anang kenya aki aaaa. Amat ku. Nih berumban angkat. Anang guai akan....tilik dulu....udah sunat kini....?" Chunding lalu angkat tama ka pangking pengudah nundi aki iya Selumba.

Datai dipangking nyau engkakah iya ketawa.

"Hahahaaaaa..!!"

"Tusah...utai lelanyah. Bulih bini utai ilal bakanya ila kini...?" Ku Selumba ngilik ka pala.

Selumba lalu angkat tama ka pangking.

**Betampung**

Anti ba tusun ke 5. Nama pengawa nama agi ulah sida meucu nya. Ba tusun ka 5 pelaba aku bepecal perut kitai maca. Stay tune au.

Dikarang: Bungai Beduri dua bali nama Endu Dara Rimbu.& Dom JJ