7 Chunding Enggau Aki Selumba

-Jerita Jenaka Iban-

*Chunding Enggau Selumba 2*

-Tusun ke 7-

🎶Amat lama aku bujang suba, bejalai kulu kili mehindang ati dihi...nadai ngiha suntuk belanja....tuju ati sigi ka ngiga bini...tang indu daha ke enggai nguna.....kasih amat gamau enda sigat...sehap menua alai ku mawa....pait enggau manis sepi semua... Enda ga aku hugi taja laun bebini, bulih daha biak iya ga buhak..bejalai kenduai kumbai hang anak...suba puas kumbai uhang aya bungas..diatu bulih gelar bahu...aya bidik tetemu ka indu bajik benama kempiii.....🎶

Adehh lawa neyaa.. Lagu aki Chunding iya nya Selumba.. Datai baru ba siri ke 2 ba tusun ke 1. Bejenaka baru enggau Chunding.. Ngarap ke tepehindang bekaling enggau aku, Chunding, Selumba enggau Kempi.

😝😝😝😝😝😝😝😝😝😝

Panjai tuchum Selumba pengudah ke belagu tadi. Anchi lagu, aya bidik.

Tampak dih kening, idup mih seput seduai meaki sekumbang aki iya Selumba ke bebini jadi enggau Kempi.

Nyau nyadi jerita apai salui ga Kempi. Sekumbang ke jadi enggau Selumba, kedai di jual ngagai urang bukai. Diatu kedai nya nyadi kedai makai dempu urang bukai. Idup mih sida sebuat, enggau chara bumai, betanam enggau betupi. Nupi manuk, serati, babi enggau ngembuan pegung ikan. Macam ikan ditupi dalam pegung nya.

Pagi nya, bebantai ke injin sepit kelia jenama Marina 36, berasur ke perau bebaie ke sengayuh nurun ke ai. Seduai meucu ke umai ngabas utai ke ditanam ba umai. Laban ke bumai padi bukit, mayuh amai utai ditanam. Ni ke rampu, ensabi, entekai, labu, jangat enggau memacam agi.

Tembu semua perengka diadu, Selumba nyetat injin sepit. Sekali ngentun nyetat tali enggai ga idup injin sepit, kedua kli enggai, ketiga kali enggai ga nyadi. Nyau isin ka reringat ati Selumba tadi, leka ka iya pia aja mih tali injin nya tadi. Palik iya Chunding ke dedugau ba penuduk perau. Baie ati iya isin tikau ke iya penimba ngagai Chunding.

"Akaaaiii....!! Nama utai labuh ari langit tu kini...? Iya lapa majuh nuan nikau aku ngena penimba tu dih akan...? Hingat enda tesetat ke injin sepit anang mih ngehis aaaa...Uji kitu kih nuan duduk ngemata ka aku nyetat injin nya. Jeha nuan leluba. Tadi aku ka nyetat ngumba kedihi ka nuan ilal. Nya mih nuan, bebini bahu nuan dapat. Kehing nuan bebini. Ga anang bendar bekeraus demalam ngai ke enda tesetat ka injin sepit..." Chunding lalu angkat ngusuk pala ke agi pedis bekau ditikau aki iya ngena penimba tadi.

Enda mayuh jaku Selumba laban ke ringat ku iya. Lalu mansang ngagai luan perau. Din iya duduk ba ujung luan sekali. Tungkun iya insap, asap kekepul. Duduk belipat kaki ba luan perau.

Baka Selumba tadi mih. Sekali nyetat bedau idup, kedua bedau, iya mih ka datai ketiga kali nyetat....

Entun Chunding penapat tali penyetat injin sepit nya. Injin lalu merengung. Perau lalu entanjar bejalai laban injin ke di ris ke Chunding penapat. Agi bedau Chunding malik ke luan perau, laban ka agi tekenyit meda perau nyau entanjar berasur.

"Buk...!"

Ko munyi utai bekedebuk. Munyi utai labuh ke ai. Tilik iya mua ari kiba enggau kanan nadai ga utai. Kuing ke belakang nadai ga utai. Perening ke luan perau....

"Akaiii....ni aki aku tu tadi..? Enda patut agi tinggal ba jelatung dedin. Manah amat penuduk iya diluan tadi. Enda patut ngeyampat nya iya engkecit agai jelatung. Anang-anang iya ke labuh tadi....."Chunding begaru pala lalu nguing ke perau nikal ke belakang baru ngiga aki iya.

Kebatang endar tadi bakatu iya.....

Selumba duduk entap nyirut ke asap insap. Belelak ba luan perau bekau ke udah lelak baie nyetat injin sepit. Benung rindang nyirut ke asap insap enda memukai tedinga ka munyi injin ke merengung disetat Chunding tadi. Tekenyit dih iya. Baie kelalu balat tekenyit, enda berasai Selumba tu engkecit lalu ketepak labuh ke ai. Nama agi, nyelam ba ai sungai betemu enggau ikan enseluai, basah dih anak cauk Selumba. Cukup pemedis ati iya laban Chunding. Beguai iya nyemerai ngelanda jelatung nganti Chunding ke nikal ngambi iya baru.

Datai ba jelatung, iya lalu niki. Duduk kerunguk ngetat kediri jempuk. Balat pucau tudah iya. Sapa ga enda pedis ati digurit ke perau.

"Mehinsa utai ilal...! Nama majuh ta nguhit ke injin ku aku. Kitai ke ambis tebehayan laban. Eee...dih antu. Nya nih....nyau abis jempuk tudah anak cauk aku...." pia ko Selumba duduk kerunguk bekerendut dada.

Ari jauh, peda Chunding aki iya duduk dedugau baka ke nganti iya ke datai. Geli ga ati iya betati ke aki iya tau teberayan labuh ke ai. Ka engkakah enggai ke danu Selumba ga. ( nyaa neyy anang ketawa kita pemacha, anu Selumba legi)

Datai iya semak enggau Selumpa diempit iya ketisi manah perau, nangi ke aki iya labuh ke dua kali.

Laban ke pedis ati, malik mua  Chunding enda mih iya. Merejuk iya ke perau lalu duduk. Bejaku enda. Mua reredu.

Chunding lalu nguing ke perau baru lalu ngemujur ke pejalai perau seduai. Pedis ngetat ke ka ketawa wai ukai bebula. Ka pan enda tucum lelinsum aja mih tudah Chunding.

Enda lama udah nya, datai sangkai mih seduai iya ba jelatung pendaie ba alai umai ti ka dilanda. Selumba lalu engkecit ke atas. Tancang ke iya ba pun kayu tali perau.

Chunding bebantai ke raga enggau uyut lalu niki ke atas.

Bejalai mih seduai ke dandang umai ngabas utai tanam.

Baru tucum mua selumba meda utai tanam nyadi magang. Bemanah buah rampu, gegeduk buah entekai, nyau liut daun ensabi. Nyadi magang utai tanam.

Seduai bela ngema uyut kena begumpul ke sida buah rampu,entekai, ensabi enggau utai bukai. Naka mih pengerindu.

Tembu ke begumpul ke bala sida sayur, enda berasai ari pan lemai. Seduai berunding ka mupuk mulai kediri. Dibuka tali perau. Sama udah nuduk kediri ba perau.

Anti bemunyi enda ga injin bemunyi. Anti bejalai enda ga perau bejalai. Tumbuh ta anyut ngapa laban tali perau ka udah dibuka. Kuing ka iya ke belakang. Peda iya Chunding duduk dedugau baka iya.

"Apuuuuu....amat ilal...!! Nama majuh injin enda disetat nuan ilal...?"perak Selumba.

"Apeeeii.....aku kumbai ilal. Aku ngarap ke nuan nyetat. Lapa nuan duduk jenuh dia dih...?Legi aku nyetat nuan ga teberayan,"saut Chunding lelinsum.

"Setat injin nya ilal. Iya ga anang penapat ka ngurit ke mutu nya dih....? Tadi badu enda, sapa ga enda tekenyit ninga munyi injin nyau engkanjung..."saut Selumba.

Nadai mayuh leman baka pagi tadi setat injin lalu mujur pejalai perau.

Baru setanjung udah bejalai,Selumba tepeda ke siku ular emparu. Laban ke buyan, enda memukai Selumba lalu manjung.

"Apaaaaii.....antu...!! Nyin antu."Naka alah mih nyawa Selumba ke manjung. Jari ditunjuk ke depan perau.

Sapa ga enda takut enti disebut ke antu pia. Injin sepit lalu digurit penapat inat. Ka nyelamat kediri ku anak ati. Perau lalu berasur ke depan ngelantak tebing. Peda luan perau udah cecangak.

Aki iya udah nadai dipeda agi. Nemu nya lari kini engkecit ke tebing. Chunding lalu muai diri ke ai.

Niki iya ke tebing peda iya agi iya ngemata ka iya ke niki kediri ke tebing.

"Amat ilal mih nuan ucu-ucu. Lapa mih nuan muai diri ke ai. Dia utai ke senakut ke aku kia ga nuan muai dihi,"ko Selumba lalu ketawa ke Chunding.

"Kati ke enda muai dihi dih empangup, iya ga nuan nyau manjung madah ke meda antu dih...?Sapa ga ka dipajuh antu pia,"ko Chunding. Ati agi kesal. Amat antu mih ko iya

Selumba tadi sempat engkecit ke tebing ai meda perau nyau encangak laban ke digurit ke Chunding lalu ngelantak tebing. Sapa ga ka pedis.

"Ukai antu.....nyinn meda nuan.....anak ular emparu nyin ku aku. Aku takut. Nya aku manjung. Ukai nuan enda nemu aku tu uyan dih...."ko Selumba nunjuk ka ular emparu ke beranyut mansa seduai.

Begaru pala tudah Chunding meda ular emparu nya.

"Amai ilal nuan aki-aki. Tusah aku ngira nuan tu. Makin lama makin jukat aku laban nuan tu, nadai endar utai senakut. Tepu dalam tancut belala utai senakut ka nuan nya..."pia ko Chunding lalu ngilik ka pala.

Palik seduai iya perau nyau lacak cecangak perau. Nasit enda pecah enda tebererak. Naka pemalat nya ngelantak tebing tadi.

"Apuu....ukai bebula aku. Manah aku parai ari aku puntul anak cauk ketegal nepu emparu nya dalam tancut. Enda kasih nuan meda. Baru ga bisi pemaie tudah iya,"ko Selumba ngelagu diri.

"Eh, enggai enggau nuan ke ilal nya aku tu aki. Pulai tua aram. Nyau endar ari tu,"ko Chunding lalu nyingkang ke dalam perau.

Setat iya injin, seduai lalu mupuk mulai kediri.

***Nangka tu dulu Chunding enggau Aki Selumba the Series siri ke 2 ba tusun keterubah. Anti ba tusun ke 2 ti ka datai. Nama enda ulah seduai iya udah tu kini...? Sama kitai nganti au. Ngarap ka teperindang maca.

....Betampung.ke 8...

Dikarang : Endu Dara Rimbu

                :Dom JJ