6 Chunding Enggau Aki Selumba

-Jerita Jenaka-

*Chunding Enggau Aki Selumba*

Tusun ke penudi ke 6.

"Mata pisu mata kapak,

Tajam lunchik nyau perenching,

Umbas-umbas mih bejeling,

Adeh-adeh cukup setipak...."

Nyaa...lawa munyi leka pantun tudah Chunding ke ngelagu aki iya Selumba enggau Kempi. NNyau malu anak ati iya meda seduai nya beperening mata betekijap. Malu-malu tekuyung ngerayap ga jari aki iya Selumba ka nyapai jari Kempi.

Ninga pantun Chunding ke ngipak amat, dia Selumba lalu nyaut.

"Buah pinang, buah kepayang,

Kelat diempa, lemi isi,

Anang ngacau kami ka besayang,

Tajam pisau enggau mata taji....."

Tetuchum iya merening Chunding udah ka mansut ke leka pantun nyaut pantun Chunding tadi.

Begaru pala Chunding ninga pantun Selumba.

"Apuuu.....amat apai tuai urang tu. Miang padi ke miang keladi. Naka mih nya ti udah jadi, nyengala iya ngansah taji," pia ko Chunding.

"Aihh....dih ucu. Bedau nemu aki kitak tu nuan ucu-ucu. Mata taji muting gehaji. Bebila hutan bebingkai besi. Bisi danjung bujang behani....." ngai alah Selumba nyaut ucu iya lalu engkakah ketawa.

"Eh, nadai ati agi aku ka besaut enggau nuan nya encabuh. Anang ngacau pugerim aku nuan ilal. Aku ke ka bebini nuan ke ransi," ko Selumba melut ke mata ngagai Chunding. Kebatang ndar iya, ngambi ke Chunding nya lari ke bukai. Ngambi ke enda ninga randau seduai iya Kempi.

"Aih, dih apai....! Mehinsa utai ilal. Iya ke ilal kitai ke di kumbai ilal. Nenuai nya agi ka bebini. Niang inik enggai ga angkat ahi sebayan mulas ke telu kugo iya nya, ngambi enda gatal ka bebini. Tusah.....tusah laban tuai kenya. Ko jaku ka ngelakin iya tadi, nyau ngasuh iya datai ditu amai ka bekecup enggau Kempi," mut-mut tudah Chunding lalu mansang ngagai apek pusu ke benung nimbang pusu.

Meda Chunding ke udah nadai dia, Selumba lalu nyapai jari Kempi. (Eihh, dihh ngakun amai).

Malu-malu tudah Kempi. Tang ati keran amat. Pengudah mati laki Kempi lalu enda belaki. Tepeda ke Selumba aki Chunding, begigit dih ati iya meda siku nya. Kiut...!! Ko ati iya mih nya.

"Aku, enda enggai dibaie nuan jadi. Tua sama bela lama nadai kaling ngimbai. Sama bela bujang daha. Nadai nya salah. Nibuh nuan ka meli ku asie, ambi mih aku tu pehi aja.... Laban aku pan ka baie nuan jadi. Tuai bakatu mih tua sama beguna pangan. Enti udah pahai ukai ka nyadi belaki bebini dih.....enti nuan kehan(keran), aram pulai mih enggau aku. Nibuh tua besanding indah udah tuai malu peda uhang. Jadi kubui mih tua. Nibuh bebulan bemadu baka enggi uhang, cukup mih bebulan to the moon..."pia ko Selumba nyeput kuyu Kempi.

"Malu ku Seyumba(Selumba). Amai aku keran. Rindu ku ninga jaku mungai-mungai nuan. Au mih, enggau nuan aku pulai legi. Tumu aku nutup kedai....,"saut Kempi tetuchum indah. Nadai beadai-adai, lalu setuju di baie pulai. Laban sigi keran. (parai dayah)

Meda Selumba enggau Kempi mujur amai beluit jari tetuchum berandau, Chunding lalu mansang. Ati iya enda nyamai meda ulah seduai nya.

"Ah,dih. Enda entu behapa utai tu. Lapa ta tetuchum tu aaaa....nama lelabi tama bubu pia ilal...?" ko Chunding.

Tekenyit Selumba enggau Kempi.  Baru ngeleda ngasai kediri berindik ba dunya nyata. Beperening ke mua pangan diri lalu ketawa.

  "Aihh....dih encabuh. Nama utai temu nuan....? Bara ngulam pusu dedin. Bakatu, Kempi enggau tua pulai legi. Jadi mih kmi duai iya. Nibuh ka duduk ba atas tawak. Beterang ba tuai pama mih. Amat mih urang nemu kami duai jadi. Badu nuan nganggau ke nama iya Kempi agi encabuh. Kangau ke inik kiut. Ninga nuan encabuh....?"ko Selumba.

Melut mata Chunding ninga nya. Lama iya nadai bemunyi. Kekebut pan enda. Mina lubang idung ke sengo dipeda laban ke ngesuh ke seput.

"Ataaaaaiii....!! Angin nama tu kini....?? Angin amar tauka puting beliung...? Amat kanji.....!! Lalu ka jadi. Tat ke dulu mih aki. Enti Kempi nya dibaie tua pulai legi, sapa bagi tua ke ngempu dih....? Tua ga sama bujang, kunsi mih tua au ilal.....? Eh, ngengiut kutai ngapa. Lembau ka nganggau ke inik kiut, mua nyau ngeredut ngeriut,"ko Chunding beduan aki iya Selumba.

Alit amat ati iya betati ke aki iya enggau Kempi, umur maya nya agi ka belaki bebini. Kumbai ta nundi mih Kempi ke ka meli aki iya. Tang bangat gerah ga aki iya lalu ka jadi enggau Kempi.

Kedai tumu ditutup. Selumba, Chunding enggau Kempi pan seretai mulai kediri. Enda memalu wai, lalu nama kediri mih tudah Kempi ke bilik penaik Selumba enggau Kempi. Ba sebut kih sigi udah enda apus tuat. Enti apus tuat lada enda ga ka nyebut.

Nama mih lemai nya, beguyang kaki, senang ati mih Selumba enggau Chunding. Asi enggau lauk bisi urang nyumai. Di nah baka tuan haja. Nibuh kumping agi betalat ka sapa bebasu pinggai mangkuk, sapa nyumai sapa betesah. Semua diintu Kempi.

Kenyang mih seduai lemai nya, mujur amat berisi. Sema ka pemakai di sumai urang indu, sigi nyenyamai.

Udah makai, ngirup kupi baka selama nganti mata ke ka tinduk. Tetuchum malik pangan diri.

"Bedau tinduk seduai aki...? Nyau jauh malam tu udah...Peda nuan nyinnnn....bulan bajik endar...."pia ko Chunding nunjuk ka jari ngagai bulan ba atas langit.

Nemu Selumba utai ko Chunding tang sigi enggai nyaut. Pemuas baru iya nimbal nelai pending Chunding.

"Cabuh.....aku tu malu amat. Lama udah kediri, diatu nyau bisi inik kiut nuan nya ga. Empa pengelama udah, nyau enda ingat ga aku. Ka tetakut, peda nuan gegetak kaki aku tu. Nuan ngerimbai iya legi au cabuh....?"ko Selumba.

"Pa....rr.....a.....i....parai.....!! Parai dayah ke nuan nya ilal. Au iya ke bebini kitai ke dasuh ngerimbai. Enda aku tu...!! Parai ti aku dipangka ka indu paga nya....! Enda berasai nyau besai nyawa Chunding. Nyee parai kitai.

Berumban Chunding angkat lalu ngunci pintu pangking. Nangi ke Kempi dasuh Selumba tama pangking iya. Ngali kediri Chunding, pedis ati ngenang ulah aki iya enggau Kempi ta ngeraya nya.

Empai lama udah nya, dinga ya nyawa urang betelai. Bekeraus munyi mayau ke ngeramak tikai.

"Nih, tadi baka nama madah kediri enda ingat. Nya ta leluba munyi mayau ngeraus tikai. Keruan dih apai....mayau tuai lepi lama enda makai pusu....!!"

Semalam-malam mih Chunding enda tinduk. Iya mih ka mejam ke mata, dinga ga keraus utai. Dini ga mata ulih tinduk. Nyau enda berasai datai ke dini ari, baru Chunding ka bebulih gi tinduk.

Dani peda jam pukul sembilan pagi. Kupi enggau tucur sayur udah sedia atas mija. Mujur amat Selumba enggau Kempi tetuchum besuap ke kuih tucur sayur. Ngipak amat baka nembiak ka baru besulu.

"Hemmm.....hemmmm...!! Ko Chunding.

Tekenyit. Bela merening ngagai Chunding.

"Duduk Cabuh, ngilup kitai,"ko Kempi mai Chunding Ngirup.

Chunding nuduk kediri lalu nebah jaku.

"Au, ngelamatu ditanjah urang ai enti aku laun dani. Pagi tu, nadai wai. Mar ga udah bisi pemalu tawak nebah ke gendang. Nadai selemut lalu aaaaa..."ko Chunding. Enda puas ati agi ka beduan.

"Udah ingat nuan aki, bakani cara-cara ngeradai...? Enda meruik anak lelabi....? Nama utai ka bemunyi ngeraus demalam aki....? Bisi mayau encuri salai pia.....? Enda teberayan sirat apai sali aki....?" ko Chunding beduan Selumba.

Sedekan ambis ensambur ai ke di irup tudah Selumba. Bebengap ngapa Kempi enda nemu utai ko Chunding.

"Enti perau meruan bisi urang ngemudi, ingat mih ke jalai iya ucu. Enda ga tesat ba lubuk jagu. Sangkai ga pa jelatung pemandI kumang. Bedayung bekayuh belubah amat mih datai....."saut tudah Selumba.

"Nyamai mih tua udah tu aki, bisi inik Kempi ngintu tua. Enda ga aku ngenggai enti seduai jadi. Amat mih enda beduan pangan diri. Nuan pan kenya aki. Madah ke tuai rumah, nuan udah jadi enggau Kempi. Anang ga mina ka ngasai ke penyamai pengidup aja. Enggai ke tua disebut urang,"ko Chunding ngajar aki iya Selumba.

Selumba nagun ke pala, ngamat ke jaku Chunding.

Sepagi nya seduai meucu bela bekeluji. Meruan mih pengidup seduai meucu. Bisi urang ngintu pemakai, gari, ruang dapur ngintu pengidup seduai.  Ta nangka mih ulah Chunding enggau Selumba. Jenaka naka alah. Ngasuh ngeli rangkai belama ngasuh ketawa.

Chunding tu sigi urang lelanyah udu beduan aki iya Selumba.

*********************************

**Bah...angka tu kitai begulai. Munyi ko urang, enti bisi rezeki, bisi pengelantang kitai betemu baru...minta ampun ku auu ..enti spmanjai jerita tu dipansut ka aku, bisi ayat ke nda mnh dbaca, nygka nya enda tperindang ke ati kita bla pemacha aku minta ampun. Tang aku udah sedaya upaya ngaga yg tbaik mrindang kita semua. Aku ukai urang pandai di chunggai jari tiga, ukai urang pintar besangai leka bebungai..tang aku saja2x ka ngarang merindang ati. Sekian ari aku...😊😊😘😘

++++Betampung ba tusun ke 7...

Dikarang : Endu Dara Rimbu./DomJJ

Cover photo Editor : Dom JJ/ John Jovi.

avataravatar
Next chapter