3 chunding Enggau Aki Selumba

-Jerita Jenaka Iban-

*Chunding Enggau Aki Selumba*

-Tusun ti ke 3-

Pagi nya, tumu Chunding angkat dani. Agi serepan amt. Baru di dinga kukuk bala sida manuk. Pengerak pagi. Angkat lalu mandi.

Tembu mandi beradu besikap indah. Cukup gap. Tak nangka iya mih. Ari keterubah gawa gagit mih ati. Laban pengawa ka betangung ke bos benung ngirup enggau makai meseti ka semat mimit mih kira ati iya. Ngica ke bos suah agi minta tangung mih nya. Ukai pedis, sesagam mimit mih pikir iya. Adeh....sempat kuning runding Chunding, alu ka nyagam. Behasai laban.

Nadai sesabar agi, penembu besikap indah. Gap ko iya mih. Cik iya kasut udah ga ngam, enda timpang agi dih.

Nurun mih tudah Chunding dih. Lawa kensung tudah Chunding pagi nya, rindu amat ninga. Kensung lagu 'Lachau bejembi'.

Pia ke bejalai nyingkang ke kaki, mulut kekimut bejaku kediri.

"Akai....Nadai utai ngeyemat tu. Sigat numbas iya. Celum manis baka aruk kali. Ngeli buhak tau dipekit. Iya ga habang. Di kehindu uhang indu. Ah, bejuluk bujang gap, enti indu laha malik alu tetingkap,"pia ko Chunding ngelagu diri ngaga ensumbar diri mpu...

*Nyaaaa...jaga kita indu laha, nang malik Chunding enti enggai tetingkap*😂

Ada lawa, panjai tuchum tudah Chunding. Gaga mat ati iya pagi nya. Enda sesabar ka megai muhit tukey niu.

"Kada aku behani legi...? Tubuh pepaga kenya....pahai ti aku tu pangka ke indu paga ke benama Kempi nya legi. Neyy....ba nama udah jaie....ta Kempi. Nama kebuah ko aku, nama tau Kempi. Anang-anang maya apai enggau indai iya ngaga suba bepangka indah. Datai ke indai iya kempi. Kada enda nya kini kebuah nama indu cina calat nya Kempi..."pia ko Chunding bejaku kediri begaru pala.

*Ney peda pemandai Chunding nempa nama uhang...calat mih ko iya*

Enda lama udah nya, Chunding datai di pasar. Kedai baru di buka. Iya lalu nulung tukey muka kedai. Lalu betusun ke barang. Tembu semua utai, Chunding diberi tukey bup siti kena nulis list barang ke kurang.

"Unding, sini dulu. Ini muku you tulis itu senarai nama untuk barang yang sutah mau abis oo....kalau itu luti kulang, pun tulis sini oooo. Sinang saja ini keleja. Kalau titak tau tanya itu amoi. Itu amoi manyak pandai,"ko tukey nunjuk ke siku kuli indu iya ba teluk dinding ke benung betusun ka barang.

Nyadi Chunding tu tadi, salah palik. Lain utai ditunjuk ka tukey lain ga utai di palik. Palik iya ngagai apai tuai siku ka nimbang pusu. Iran ga ati Chunding tu tadi.

"Apuuuu, amat tambab Kempi Calat tu! Buta ke nama....?Ngengerang nyin apai tuai urang, dipadah ka iya amui ga! Cih.....bangka udu! Aruh nama Kempi....! Dadak."Pia ko Chunding bejaku kediri mut-mut.

Begisai begaru pala. Ngaru pala ke enda gatal. Bejaku kediri baru ga Chunding.

"Sigi bangka Kempi Calat tu! Makin aku enda nemu nulis. Legi asai, kerido aku ngapa utai tu ditu legi. Legi asai iya, macha tulis bilun bepeling." Ko Chunding muchau kediri.

Nadai nanya urang, alu mupuk mih Chunding ngerido bup nya. Ditulis ke iya ngapa. Peling ke iya kulu, peling ke iya kili mih utai tulis nya dia. Ni ke baka kandut tusu, ni ke baka iku manuk mih utai ka ditulis. Mayuh agi ke baka bilun bepeling. Sigi sebingau pala tukey meda nya legi. Kada enda luput dih.

Ngena mih ko ati iya ngam mih nya. Tembu ka ngerido nulis bup nya, Chunding nyua bup ngagai tukey lalu bejaku.

"Tukey, tu list tadi. Ta nadai magang utai nya dia. Kuhang memagang..."pia ko Chunding nyua ke bup.

Sekali.......

"Apuuuuuuuuuuuu....Ko iban! You tulis apa ini Unding..? Mau kasi saya pingsan kah...? Sebening pala saya Unding tinguk ini buku. Bikin lagi! Tanya itu olang saya tunjuk tadi. Siap nanti kasi saya, kita pelegi(pegi)ngilup.."pia ko Kempi.

"Nih, dinga nya. Aku di padah ke cina dadak nya kelup!"ko Chunding. Ngirup ko tukey nya kebendar iya. Tang enda datai sebut.

Nyau mih tudah Unding cecapu mansang ngagai apai tuai ka nimbang pusu tadi.

"Nih, enda berumban maie aku ngirup. Ukai nama nya, laban enda sabar minta tangung aku. Apeeii ...kanji! Ko Chunding.

Datai ba mua tukang penimbang pusu.....

"Apek....! Aku tu udah danu tukey Kempi nyin tadi. Laban enda nemu nulis. Ka minta tulung nuan nulis ke aku nama barang ke kuhang din,"ko Chunding nunjuk ka palan alai ruti.

Bendar tudah tukang penimbang pusu nya malik mua Chunding. Pedis ndar ati iya di kangau ke Chunding Apek.

"Legi.....legi.....legi asai nuan. Gamal baka pala pusu, ka nganggau ke aku Apek! Legi nuan akan.....akan....." alu baka mintul pansut ngenyit penemu tukang penimbang pusu. Ka ngereja ka Chunding. Ada tuchum apai tuai urang nya.

📝📝📝📝📝📝📝📝

Nyadi senarai ka ditulis apai tuai penimbang pusu nya bakatu :

1 : Huti penat segiempat

2 : Huti sebayan empa uhang mati.

3 : Gula batu pemalu tawak (lolipop)

4 : Sekelin tusu.

5 : Huti telu segala

6 : Huti puak taie cicak

7 : Pau tanah mehekah

8 : Sadin cap buhung

9 : Sadin kasam ikan

10 : Sadin itit nyemehai.

Nya mih list ke ditulis tukang penimbang pusu tadi. Ingin amat iya ka reradak ketawa, tang nangi ke Chunding nya nemu ga.

"Jeha asai, aku ngemiak tu kangau ke nuan Apek!" pia ko tukang penimbang pusu bejaku dalam ati.

"Nyah, udah tembu. Sua agai Kempi alai,"pia ko apai tuai urg nya.

Nyau mih tudah Chunding dih. Nyua ngagai tukey nio.

Datai ba tukey......

"Ini tukey, sudah tembu."Ko Chunding.

"Okey, Unding. Aram minum tua,"ko tukey mai iya ngirup.

Enda jauh, takah 2 pintu aja kedai makai alai duai iya ngirup. Kangau ke seduai urang ke alai ngudar pemakai.

"Mau makan apa...minum apa..?pia ko tukang ngambi udar pemakai.

"Makan ai milo celap, minum bihun guring telu manuk. Campur manuk ayam jangan.."ko Chunding. Jari keketuk natuk mija. Senang ati ka makai.

Ada bebengit mua tukey indu ya nya tadi enggau indu tukang alai ngudar pemakai. Nemu ga tudah utai ke Chunding. Ta tulis aja mih.

Bela udah ngudar, nganti ke datai aja mih.

Takah 20 minit udah nya....

Pemakai pan datai. Dulu Chunding nyuap penyuap. Nama kebuah ? Laban nangi kediri, ti benung makai enggai ka ditangung tukey iya makai.

Kempi bebengap mih, meda Chunding nyau baka ka enda kala makai. Lepi mih nya pikir iya.

Ambis diri pemakai Chunding. Teraie naka pemendar.

"Erk....erkkkk....Akai kenyang amai aku. Nasit mih Kempi enda nangung maya aku makai,"pia ko ati iya.

Baru sesuap tudah Kempi nyuap, Chunding agi rilek. Ngetat kediri kenyang. Kedua, ketiga kali, Chunding pan lalu angkat. Belubah iya bejalai angkat nyingkang ke belakang bangku tukey nio iya nya tadi.

Begadai iya ka nangung tukey, ngangkat ka ari bangku. Tangung enda alah, tangung baru enda ga alah.

Nyepi ta lain asai, meda ulah Chunding ta lain tukey lalu nanya. Iran dih ati iya.

"Ohhh Unding, lapa nuan nangung aku....? What your purubulum(problem)...?pepesap mata tukey ditangung Chunding tang enda ngenginsit.

"Apuuuu....kemaya aku ngulum...? Ngemulum kutai ngapa Kempi cina dadak tu! Ni enda dadak...? Au...iya empu ga madah, enti makai ngirup tangung. Tu aku ga danu.....amat dadak aaaa...."ko Chunding begaru pala.

"Itu hali, tukey ada kasi tau. Kalau makan minum kena tangung. Sebab itu saya katung kamu. Tapi tidak lapat. You manyak lemak," pia ko Chunding.

"Kuat mudo (budo)! Bukan macam itu maaa.... You makan minum sini saya belanja. Bukan kasi angkat saya punya muntut(buntut). Ada paham...? Palui....? Ko tukey Kempi seraya ka gidan meda penambab Chunding.

"Prrangggggg....!

Dinga munyi kaca merempas. Pinggai labuh. Laban ke meinggir-ingir tisi mija.

Ninga nya, datai tukey kedai makai ngelawa seduai. Lalu bejaku ribai.

"What happens...? Opps...no! You must pay for all of this! Very stupid!" ko Tukey nya.

"Nama iya tu ko aku. Ngengapin kutai. Pinggai udah pecah, di apin ka iya ga. Ngiga Pay. Kini ke Pay digiga iya ko aku. Ngegerang Pay saritu gawa nebas humput di humah din. Amat dadak cina tu. Ta gila memagang urang ka enggau aku tu begulai," mut-mut mih Chunding tu tadi.

Nyadi bakatu, sida Chunding serumah bisi urang benama Pay. Pay tu tukang penebas rumput tisi jalai. Nya utai ko Chunding. Laban ke enda nemu reti jaku urang putih, dikemuntang ka iya memagang utai. Kumbai iya ngiga Pay mih cina nya tadi.

Nama mih udah nya, bebayar mih tukey ka benama Kempi tu tadi. Begilik pala enggau ulah Chunding sepagi nya. Mupuk mih seduai iya mulai kediri ke kedai. Berunding ka ngecik utai ka ditulis Chunding tadi, laban ka ngudar barang ke nadai agi.

*Bah, angka tu dulu au. Panjai amai asai. Anti ba tusun t ka dtai, bakani nda gaya tukey ke benama Kempi meda utai ditulis Chunding kini...?Nama ulah Chunding udah tu kini...?ila kitai nmu auu...

*Betampung* ba tusun 4

Dikarang : Endu Dara Rimbu Enggau John Jovi